Den menos di un luna Aruba a conoce su di dos bommelding na Aeropuerto. Y aunke prome cu esaki, e situacionnan aki ta scars, no ta kita cu esunnan cu ta haci nan mes culpabel di dje merece un castigo mas pisa cu djis un par di dia den cel. Por lo menos esey ta e reaccion popular cu a bin dilanti riba media social, despues cu un homber a paralisa operacion di Aeropuerto Internacional Reina Beatrix diadomingo anochi ora el a duna indicacion cu e tin un bom. Ademas di comete un acto castigabel, e persona aki a causa consecuencianan grave y dañonan costoso pa Pais Aruba.

Den su cobertura di e sucedido di ayera nochi, e portal di noticia 24ora.com a indica cu e hende muhe cu a genera alarma di bommelding den luna di december ultimo, a ser deteni dia 17 di december (diadomingo tambe), y ya caba prome cu Pasco e tabata bek riba caya. Mas aleu ainda, e persona en cuestion ta causando problema na diferente bario di Oranjestad cu, te hasta, a rekeri di asistencia di Polis atrobe.

Similar na casonan di abuso sexual di menor y di violencia domestico, e critica ta dirigi na Ministerio Publico y su fiscalnan. E ciudadano comun y coriente ta di opinion cu husticia mester baha un un man mas pisa riba e antisocialnan aki, y ta sinti frustra ora di tuma nota cu apenas oranan despues e sospechosonan ta bek riba caya, liber pa bolbe ripiti nan fechorianan. Te hasta ta burla di e sistema hudicial.

Apesar cu e funcionarionan di Ministerio Publico ta argumenta cu ta nan ta djis sigui e parametronan hancra den ley, comunidad ta sinti frustra di mester wak con e circulo vicioso ta keda ripiti. Mientras tanto servicionan na aeropuerto ta keda interumpi causando molester na bishitantenan di nos isla, personal di autoridadnan manera Cuerpo Policial y Cuerpo di Bombero, Comision di Calamidad, entre otro, mester drenta den accion generando gastonan astronomico.

Manera describi riba e pagina web di Ministerio Publico, nan funcion principal ta parti den 4 tarea, cual un di nan ta: Mantencion di ordenanzanan legal. Esaki ta nifica cu Ministerio Publico ta encarga di mantene ordenanzanan legal pa percura cu habitantenan di Aruba no ta viola e regla- y leynan. Violacion tin castigo y asina ta preveni, domina y combati criminalidad. Den otro palabra, ora cu un persona sa cu si e comete un acto castigabel, e ta sali liber toch, e no lo pensa dos biaha pa hacie di nobo.

Despues di a bira conoci cu Ministerio Publico ta hayando un fiscal joven y Arubiano, hopi tin speranza di por wak un cambio den con delito y crimennan ta wordo persegui y castiga na nos pais. E proposito di un straf ta di laga e persona no keda cu gana di bolbe comete e acto cu a trece e castigo na prome instante.