Pakico propaganda “free parking” mientras cu tin yen regla mara na esaki? Esaki ta solamente 1 di e comentarionan di e multitud cu a subi auto y dicidi di bishita caya grandi pa haci nan compras di fin di aña, probechando cu parkeer ta gratis. Hopi ta esunnan cu a haya nan ta saca placa extra prome cu nan a bay cas como cu nan auto a wordo geklem.
Kico a bay robes cu tur informacion no a yega na comunidad no ta cla, hecho ta cu gran mayoria di esunnan cu a haya klem tabata pa a para den vak geel cual ta pa personanan cu permiso so para. Aruparking a pone un recordatorio riba nan pagina di Facebook indicando e dianan cu lo tin free parking y tambe cu e reglanan normal lo conta mirando cu Aruparking lo ta trahando y e mashinnan tambe.
Splicacion free parking
E proximo dianan di free parking pa e aña aki lo ta 21, 22, 23, 24 y 31 di december. Mester enfatisa cu e “free parking” ta solamente pa personanan para den vak blanco. Pues unda cu normalmente lo bo mag di para y cu mester paga, awo por haci esaki sin paga. Pa personanan cu ta traha den caya grandi y cu ta paga pa nan espacio geel di para auto, nan mester keda uza esakinan y no bay para unda ta blanco y gratis. E vaknan blanco ta estrictamente pa clientenan por haya luga di parkeer pa nan por haci compras den centro di ciudad. Pa enfatisa, e vaknan geel ta specificamente pa esunnan cu tin werkvergunning pa e zona specificamente. Aruparking ta bisa tambe cu den caso cu e reglanan aki no wordo respeta lo mester tuma paso contra esaki. E vaknan geel ta paga, y mester garantisa e luga pa e trahadonan.
Locual cu comunidad ta pidi ta pa e zonanan cu ta wordo uza pa trahadonan cu ta traha den siman solamente, pa eseynan tambe wordo poni disponibel pa comunidad. Pasobra den fin di siman, locual cu a presenta ta, cu e vaknan blanco tur tabata yen y rond di nan cantidad di vak geel bashi.
Trabou normal Aruparking
A pesar di tin free parking, Aruparking lo ta trahando y controlando pa tur persona cu ta para fout (riba acera of unda cu no tin un vak). Pa e motibo aki comunidad y specialmente automobilistanan mester tene cuenta cu e esaki pa no haya nan den un situacion cu no ta desea. Mashinnan tambe lo ta trahando pues personanan cu no pone atencion cu ta free parking y hinca placa den e mashin, esaki lo tuma e placa y no ta duna placa bek.
Reaccion medio social
Manera ya ta un custumber hopi ta esunnan cu ta subi nan Facebook pa duna nan comentario den diferente situacion. Esaki un biaha mas tabata e caso na momento cu varios hende a haya klem na nan auto. Hopi disgusto a wordo expresa y algun di e comentarionan ta cu nan ta confundi, pakico at bisa free y no ta free. Otro at bisa, masha free parking y ta klem auto. Otronan mas disgusta cu e situacion a bisa: Hende mes gusta pa nan klem nan auto, pa kico boso ta bay playa? boso sa di antemano cu nan ta bay klem boso auto. Sigui bay playa y aki poco dia ta boso pia nan ta klem no boso auto y cu tin otro caminda pa bay shop. Un otro persona a comenta tambe cu parkeerwachters ta den cercania y nan no ta avisa niun persona cu nan ta para fout, sino ta bay klem nan si manera cu nan kita bay. Esakinan ta algun di comentarionan cu ta circula pa loke ta free parking cu tabata un iniciativa di comerciantenan y tambe di gobierno pa trece mas persona den centro di ciudad pa haci compras. faltando algun dia mas di free parking, mester keda pendiente pa wak con e situacion lo desaroya y si caya grandi ta beneficia di esaki.
