Recientemente riba rednan social por nota un cantidad di post di ciudadanonan preocupa cu ta comparti areanan di mondi y hasta residencial riba caya, unda por mira cantidad di desperdicio cu ta laga atras benta sin ningun tipo di consideracion.
Algun ciudadano ta critica e maneho unda cu a dicidi di cera dump di Parkietenbos, indicando cu a laga hende ‘sin opcion’ pa benta sushi. “P’esey miho nan no cobra pa dump, hende ta tira den mondi,” usuario di Facebook di inicial N.L. a comenta. “Pero cu dump a cera hendenan no tin opcion. Ta nos so ta mir’e,” usuario R.F. a agrega.
Sinembargo, otro usuarionan ta mira e hecho cu ta e hende cu ta tira e desperdicio sin consideracion ta esun responsable pa e destruccion aki. Usuario A.C. a comenta: “Puntrando mi mes si esnan cu ta haci esaki lo ta falta un sentido di responsabilidad civico, si nan lo ta falta e stimacion ey pa nos baranca tan stima, si nan no lo ta kere den e bienestar di nos tur cu ta biba aki, etc., etc.?”
Minister di Naturalesa, Ursell Arends, a dirigi su mes riba e situacion aki caba, ya cu desde cu a anuncia e ceramento di e dump na Parkietenbos ta tende hopi critica. Ayera, Arends a responde na un usuario di Facebook bisando simplemente: “Aug 22, 2023, stay tuned!” indicando cu riba e dia ey lo mester bin algun anuncio di cambio di maneho of introduccion di un plan pa atende e situacion aki.
Ta conoci cu Bureau City Inspector, a traves di e app Fixi, ta atende cu situacionnan unda mester haci un area di Aruba limpi. Sinembargo, ta parce cu e cantidad di dump ilegal y sushedad tur caminda ta surpasa e capacidad di BCI pa maneha esaki.
Na october 2021, vocero di BCI, Robby Rosel a papia tocante e situacion specifico na bario di Santa Lucia, bisando: “E ta asina un mal hecho cu ciudadanonan ta drenta mondi y tira sushi di forma aki.” Rosel no ta duda cu ta hende di e propio bario. “Nos ta haya yamada tur dia di sushedad na cantidad cu ta asotando Aruba.” Rosel ta urgi pa ciudadanonan asumi responsabilidad y deshaci di sushi den forma responsabel.
