ORANJESTAD – Minister di Medio Ambiente, Otmar Oduber a expresa ayera durante un conferencia di prensa loke ta trata e conscientisacion pa temporada di campamento, cu ta inicia otro siman. El a bisa cu a traves di un ekipo cu a wordo poni hunto cu departamento di Polis, DOW, DIP, lo percura pa duna conscientisacion suficiente pa tur esunnan cu ta haci campamento na Aruba.
Di loke ta trata e campamento den area di Eagle Beach, pa via di e trabounan cu ta tumando luga na Watty Vos Boulevard, el a expresa cu director di DOW a bisa cu esey no lo bay afecta of perhudica ni un hende cu ta campa den area aki, ni den ningun otro area.
Al contrario, manera Oduber a bisa, esey lo stimula y lo duna e flexibilidad pa esunnan cu ta bay haci uzo di e beachnan pa campa den e periodo di Semana Santa, y ‘asina nan lo por haya asistencia di diferente departamento, semper y cuando e comunidad ta cumpli tur nan obligacionnan tambe’ como ciudadano di respeta reglanan, leynan, sigura di cuida e luga unda a bay campa, y cu tambe mester tene cuidou pa motibo cu ta temporada di ponemento di webo di turtuga.
Por ultimo, minister a comenta cu tabatin un discusion pa via di si e comunidad por campa cu trailernan cu ta subi riba e beachnan. El a manifesta cu nan tin un ley cu ta prohibi pa vehiculonan di motor subi riba e beachnan, afirmando cu nan a permiti y lo sigui permiti. E caso ta, segun Oduber a expresa, cu e personanan no por pone un trailer riba e santo blanco cu lo por perhudica e cuido di e beachnan, pero no ta nifica cu e personanan no lo por bay cu un trailer y campa den un banda cu no tin santo blanco, por ehempel abou di mata di druif.
Tambe minister a recorda cu e personanan no por haci barbecue cu carbon riba e beachnan. E reglanan cu semper tabata existi ta wordo reforsa, y e aña aki lo tin un control mas fuerte y completo. Cuminsando otro aña lo tin e flexibilidad pa haci di manera responsabel, sin cu tin e posibilidad di vehiculo di motor of azeta basha riba e beachnan.
