Fin di siman ultimo, Aruba por a mira con e comportamento di hende ta bayendo hopi leu: fiestanan, bringamento y detencion na lama, accidentenan di auto pisa, factornan cu por wordo considera un falta di respet pa esunnan cu ta lucha cu malesa di Covid-19 y tambe pa esunnan cu ta trata di cuida nan mes.
Fin di siman aki tabata uno unico. Diferente medionan local a reporta con personanan a sali pa dal un par di drinks y comparti cu amigonan na lama, aunke Aruba ya caba tin un total di 1.474 caso activo, 10 persona ta den unidad di cuido intensivo (ICU) y 20 persona a fayece.
Di mesun manera, a keda conoci cu cuerpo di Polis hunto cu DWH a conforma e unidad di “Task Force bedrijven” pa di e manera aki subi caya y haci control necesario relaciona cu e brote di Covid-19 na Aruba.
Nan a multa algun restaurant y barnan, na unda a bin constata cu no tabatin protocol pa loke ta trata distanciamento social. No tabata haci uso di tapaboca, como tambe algun a keda habri despues di 11or di anochi.
Nan a laga conoci cu lo sigui haci control di luganan intensivamente durante dianan aki den ora di dia y anochi y si tin algun cu no cumpli pa yuda reduci e cantidad di casonan di Covid-19, ta core e riesgo di haya un multa of keda cera.
Diadomingo ultimo, accidente pisa di auto a keda registra na unda e personanan a keda herida y a wordo hiba pa hospital. Na Eagle Beach y Mangel Halto polis a bay actua contra aglomeracion di hende cu no tabata aplica distanciamento social y tambe 2 persona a keda deteni pa bringamento.
Lito Lacle di Cuerpo di Polis di Aruba expresa cu ora nan ta sali patruya y wak un grupo di hende di mas di cuatro persona, nan ta hala su atencion, hiba e persona deteni of duna multa depende di e caso. Den area di Eagle Beach patruyanan di polis di diferente districto a bin pa retira un grupo, cu segun el a sigura, tabata trata di mas di 40 persona.
Plamamento di virus ta bayendo asina lihe, cu Hospital Dr. Horacio Oduber y specialistanan ta alerta riba e situacion hopi critico. Y nan no tin suficiente personal pa area di cuido intensivo. Nan a splica cu varios persona a muri y hopi lo muri pa via di otro malesanan, pa loke nan a sigura cu “e situacion ta hopi grave”.
Pa via di aumento di camanan pa Covid, nan ta indica cu no tin espacio pa dokternan specialista por haci e tratamento necesario pa cuido di pashentnan esencial, pa loke nan a pidi di urgencia pa pueblo por fabor keda cas.
Si bien a keda conoci y a wordo ripiti varios biaha, tanto di autoridadnan como di e mesun prome minister di Aruba, cu e pais ta den crisis y esey ta rekeri un cambio di comportamento hopi grandi, ta supone un carga psicologico pa e personanan, e comportamento ta yuda alinea e recomendacionnan di epidemiologo y expertonan den salud publico.
Door di un aumento lihe di casonan, Departamento di Salud Publico a expresa cu ta dificil pa Task Force por controla tur e personanan na nan cas. E ta keda na responsabilidad civil di cada ciudadano pa keda cas ora su test of esun di algun familiar of persona cu a haya contacto cune a sali positivo.
Un desafio cu algun persona algun biaha ta exhibi ta “tendencia optimista”, loke ta nifica cu nan ta kere cu e cosnan malo tin menos posibilidad di sucede pa nan mes. Esaki por ta util pa evita emocionnan negativo, pero por hiba e personanan pa subestima nan probabilidad di haya e virus y ignora e advertencianan di salud publico.
Por mas fastioso cu por ta, distanciamento fisico y social hunto cu aislamento ta medidanan efectivo pa controla e transmision di e virus, aunke nan mester di un impulso diferente, como di doñonan di trabou, gobierno y tambe e mesun ciudadano, pa tuma accionnan cu por yuda disminui e exposicion di e virus.
Pa finalisa, comunidad tin cu ripara cu Aruba ta un isla chikito, espacio na hospital ta limita. Cuminsa tuma medidanan di prevencion, cuminsa para keto y pensa riba nan mesun famia pa evita cu mas plamamento di virus lo sigui tuma luga. Covid-19 a trece un cambio na henter mundo, pero ta na banda di cada ken cu su comportamento pa sigui aumenta e casonan of crush the curve.
