Diabierna ultimo, algun organisacion, personanan cu ta pertenece pa comunidad LGBTQ+ y otronan cu ta apoya e causa aki na Aruba a haci un manifestacion pacifico den oranan di atardi pa mustra nan mal contento pa loke ta trata e suspension di tratamento di ley di implementacion pa cambionan den Codigo Civil.

Egmar Irausquin di Stichting Orguyo a expresa pa Bon Dia Aruba cu nan fundacion ta bringando pa trece igualdad y pa tin leynan igual pa tur hende na Aruba.

Asina mes, el a splica cu Parlamento di Aruba a pasa e amienda cuatro of cinco aña pasa segun el a sigura, di e cual diamars ultimo esey tabata supone cu lo a wordo concretisa, Irausquin a señala cu a tarda mas cu un aña pa por pone esaki den agenda for di 2019 y ora nan a wak cu por fin a wordo haya un espacio pa ponel’e riba nan agenda esey a wordo cancela.

“Presidente di parlamento a cancela e reunion y e no a duna un motibo ni un otro fecha” Irausquin a bisa.

Mientras tanto, el a declara cu nan ta sigui warda como ciudadanonan di e pais aki pa haya ‘un poco di derecho igual’, loke nan kier logra ta pa tur hende tin e mesun derecho, no ta importa di na unda e persona ta bin, ni su colo, ni su sexualidad.

Irausquin a expresa cu el a dicidi di apoya e causa no pa motibo personal, ni tampoco pa casamento manera hopi hende ta kere, na Boneiro of Hulanda personanan di mesun sexo por casa y bin Aruba y e ora ey e matrimonio ta keda reconoci “y thats it, no tin ley pa yuda bo cu nada, bo matrimonio no tin ningun ley cu ta bay yuda bo ni sostene bo manera cualkier matrimonio normal”.

El a trece dilanti cu tur ciudadano na Aruba tin cu paga impuesto, “tin diferencia di loke mi por haya pero ora mi tin cu duna e ora ey si mi tin cu duna mesun cos”, Irausquin a sigura.

Ademas, el a comenta cu Aruba ta un isla ‘bendiciona’ pa motibo cu no ta registra casonan di violencia contra personanan homosexual pero esey no ta kita afo cu tin hopi hende cu ta pasa den problema, ta existi hopi bullying, tin famianan cu ta rechasa famia, no por wordo compara cu otro paisnan manera Jamaica of Rusia cu tin hopi mas problema, pero esey no ta haci cu pa nan e cosnan ta bon.

Di mesun forma, Raizha Jansen representante Trans di LGBTQ+ a indica cu e motibo di nan manifestacion ta pasobra nan a ricibi e noticia cu Parlamento a pospone e tratamento di ley di implementacion pa cambionan den Codigo Civil y esey a pone cu e grupo aki manera el a splica “ nos a bira fastioso over di esey pasobra nos ta wardando esey, pero pa un of otro motibo esey no por sigui y ta inaceptabel”.

E motibo pakico Jansen ta kere cu esaki no a bin dilanti den Parlamento ta “pasobra nan no kier touch e tema, pero mas despues ora tin eleccion tur hende ta bay core usa LGBTQ+ den campaña”, Jansen a manifesta.

A wordo a puntra si nan ta pensa cu Aruba ta un isla LGBTI Friendly y Jansen a comenta cu e no ta kere esey, Aruba mester trata e tema aki cu ta “kishiki” basta hende manera el a afirma, pero e ta un tema cu mester wordo papia, ta su ora, ta su tempo y e no ta kere cu mester warda te ora cu campaña ta bin.

Di mesun forma, abogado y ex-parlamentario Desiree Croes durante un sesion informativo via su red social tocante e tema aki a trece dilanti cu dos persona cu a pasa di 18 aña y cu ta scoge pa nan regla nan relacion door di leynan ta haya proteccion riba nan relacion.

El a splica cu for di aña 2016 el a entrega un amienda pa motibo cu esaki ta hopi importante pa e discusion aki mester bin y esey a tuma luga, esaki ta un topico polemico y el a bisa cu tabatin gruponan den contra y di acuerdo cu esaki. “Personalmente a mi a wordo lastra, pero e ta algo normal pasobra bo mester tin e discusion”, Croes a señala.

Despues di esey, el a entrega dos amienda pa motibo cu e mester acomoda e otronan cu te’y eynan pasobra cu “bo por pasa un amienda si bo tin mayoria den fraccion”, aunke despues el a haya e apoyo di un partido cu pa ta ‘cristian democrata’ no ta supose di apoya e accion aki, Croes a sigura.

“Mi ta enormemente orguyoso y agradecido na mi coleganan cu a haci esey a pesar di nan ideologia”, el a bisa.

Asina mes, el a menciona cu esaki ta un derecho humano pa personanan por formalisa nan relacion, na e momentonan aki el a afirma cu Aruba tin un gobierno cu ta consisti di un partido social democrata cu tin e mayoria (MEP), un otro cu ta liberal (RED) y POR cu a bay eleccion cu e tema di ‘Gay Marriage’.

Di esaki, el a trece dilanti cu ta straño cu bou di gobierno cristiano democrata cu a introduci igualdad pa un grupo cu pa hopi aña a wordo discrimina y cu awor cu un gobierno social democrata con e tema di legalisacion di matrimonio igualitario e derechonan di e grupo LGBTQ+ a wordo para.

“Tabatin hopi discusion den gobierno anterior pero e gobierno ey a duna mi e plataforma y e posibilidad di trece igualdad pa e comunidad LGBTQ+” el a declara.

Pa finalisa, el a expresa cu como ciudadano e ta kere cu a yega ora cu mester laga tur e discusion na un banda y pasa e ley aki cu ta importante pa tur, “e cos aki no mester influencia bo bida asina hopi, mi bida y mi derechonan no mester ta bo stress” Croes a señala.