2LGBT (1).jpg

Comunidad LGBT ta comparti cu Bon Dia cu nan ta lamenta hopi cu tin tanto discriminacion riba un isla asina chikito manera Aruba.  Presidente di ALFA, Sr. Maikel Kelly ta bisa Bon Dia cu di comienso a busca manera pa purba comunica y forma dialogo cu entre otro representantenan di iglesia pero cu nunca a logra di dialoga debidamente.
”Como tres aña pasa nos a busca contacto cu iglesianan y cu e Cristiannan uni, anto semper nos a sinti un ‘tegenwerking ‘. Semper nan tabata oprimi nos. Nos a yega di haci tres aña pasa un consulta cu nan unda nos a wordo discrimina grandemente. Nan a hasta saca Desiree for di e combersacion, nan no a respeta ningun di nos puntonan di derechonan humano”,  Sr. Kelly ta bisa Bon Dia.  Sr. Kelly ta bisa cu nan no ta ataca Dios creador cual tambe ta hopi importante den curason di comunidad LGBT mescos cu cualkier otro fiel siguido di Dios, pues no ta compronde pakico tanto ofensa. ”Dios ta para pa amor, y locual mi ta mira ultimamente na Aruba ta net lo contrario cual ta un division crea, y nos manera comunidad LGBT ta un di esnan cu mester sufri dor di esaki.  Nan ta mal uzando e palabra di Dios y Democracia aki na Aruba anto asina tambe purba influencia cierto hende dunando nan mal informacion”, Sr. Kelly ta bisa.  For di comienso ta papiando di Union Civil, y no di matrimonio pues e parti di mal informacion a hunga un rol grandi den no por a comunica cu otro apropiadamente.

No tabata kier politico den e dialogo

Parlamentario, Sra. Desiree de Sousa Croes ta conta Bon Dia cu en berdad den 2013, organisacionnan ALFA y True Colors a busca un acercamento cu Iglesianan Uni cual a bay completamente malo. ”ALFA a invita mi, True Colors y Rudy Lampe pa bay combersa cu iglesianan uni ya cu tabata tin hopi atake. Esaki tabata un iniciativa di Maikel Kelly cu su organisacion y mi mester bisa cu el a bay hopi teribel.  Ami no a keda den e combersacion, nan a core nos na un manera masha mahos pasobra no tabata kier politico den e dialogo.” Sra. Croes ta bisa.  Esaki tabata un esfuerso cu a wordo haci pa purba di bini hunto y dialoga riba cierto indiferencia y conflicto di interes, pero cual tog no duna ningun resultado productivo.  ”Ami no a sinti mi personalmente ataca cu nan a saca ami y Pader Lampe for di e dialogo pasobra kisas mi a pensa asina nan por dialoga mas miho pa papia mas liber, pero Pader Lampe a haya esaki hopi ofensivo.  Ya cu tabata di bay discuti religion cu biblia, Sr. Rudy Lampe a comenta cu el a studia pa bira pastoor pues tabata su deber pa e keda den e reunion den cual e no a keda mucho largo tampoco”, Sra. Croes ta bisa.
 
 
Diferencia di opinion,  atakenan personal

Segun Hiacintha Thijsen ta splica Bon Dia den un combersacion algun siman atras, a purba di dialoga cu Sr. Maikel Kelly e tempo ey te na punto cu a bis’e pakico e mester bay cu un pareha di mesun sexo siendo cu por djis busca un persona femenino lesbian pa asina por sigui  rende mundo. Esaki entre otro tabata un di e puntonan cu a wordo treci pa dilanti bisando cu nan ta yiu di Dios y no tin motibo pa nan tuma e caminda aki pasobra homber cu homber, of muhe cu muhe no por produci un yiu.  Esakinan ta entre otro diferencianan di opinion y atakenan personal cu seguramente ta limita e posibilidad di un dialogo apropia entre e grupo religioso cu comunidad LGBT.  ”Mi a ripara desde inicio cu nan no tin respet pa posicion di otro hende, y dor di ofende, abusa cu palabra nan ta kere bo lo sinti asina malo pa bo pidi pa nan acepta bo of algo asina, mi no ta compronde.  E problema cu mi semper tabata tin cu Cristian ta cu hopi di nan a haci malo den nan bida anto nan a arepenti y bini bek, drecha nan bida y husga tur otro hende. E manera cu nan ta haci como cu nan so tin derecho riba Dios mi ta lamenta masha hopi mes”, Sra. Desiree de Sousa Croes ta bisa.