Maikel Kelly, representando Alternative Lifestyle Federation Aruba (ALFA) na Corsou, ta conta Bon Dia su experiencia durante parada di Gay Pride. E parada ta forma parti di un serie di eventonan cu lo tuma luga na Corsou den cuadro di Gay Pride Week.

Prome Minister di Corsou y algun parlamentario a duna cara durante e evento pa expresa nan solidaridad cu comunidad LGBT. “E pride tabata grandioso, mas cu 400 hende a presenta pa celebra nan orguyo y nan solidaridad cu comunidad LGBT di Corsou”, sr. Kelly a expresa. Loke a resalta durante e parada tabata cu henter e brug a wordo ilumina cu e diferente colonan di e regenboog y wordo dorna cu banderanan di regenboog.

Prome Minister di Corsou ta expresa solidaridad Tur esaki a wordo acompaña pa un brassband, ‘cual a dun’e un ambiente di Carnaval’. Mientras caranan prominente a expresa nan solidaridad cu comunidad LGBT. Prome minister di Corsou Eugène Rhuggenaath a hiba palabra durante un concierto despues di e parada, cu un discurso ‘historico pa un prome minister den Reino Caribense’. E prome minister a expresa su solidaridad cu e comunidad. Specialmente sr. Rhuggenaath a duna mensahe di stop cu discriminacion comparando esaki cu discriminacion di hende muhe, hobennan y discriminacion a base di rasa. Pa un bista mas detaya riba discurso cu prome minister Rhuggenaath a hiba, por tira bista riba pagina 9 di nos edicion. Mientras siguramente a wak hopi positivismo durante e parada, tabatin cierto personanan cu a stroba pa medio di insulto, segun sr. Kelly. “Mi no a presta mucho atencion pasobra tin hende cu tabata bisa cu si sigui asina, horcan Irma cu Maria lo pasa Corsou tambe. Esaki mi a haya un tiki absurdo.

E situacion den cual horcannan ta laga otro islanan den Caribe no ta algo pa culpa hendenan inocente cu ne”. ‘Nos ta hende, mescos cu otro den tur aspecto’ E eventonan, segun sr. Kelly, ta hopi bon organisa. Pero mas importante ta e mensahe cu e organisadonan Floris Hotel y Gay Pride Corsou kier trece dilanti. “E meta ta pa uni e comunidadnan. Mirando cu den pasado a yega di bisa cu e Gay Pride ta wordo organisa
pa comunidad LGBT, e biaha aki ta enfoca riba un grupo mas grandi”. Pues e biaha aki e organisadonan ta kere cu ta importante pa inclui tur hende, sea aliado of no, pasobra ‘nos mester e apoyo di heterosexualnan’. Alabes sr. Kelly ta expresa cu ‘e heterosexualnan tambe mester e apoyo di e homosexualnan pa nos por comprende miho kico ta pasando den comunidad’.

Segun sr. Kelly, ta importante pa e diferente gruponan traha hunto pa conscientisa comunidad en general cu preferencia sexual no ta determina e bida di e persona. “Nos ta hende cu ta traha, cu ta studia, cu tin yiu, etc. Loke preferencia sexual ta toca ta vida priva. Pues nos no ta stroba niun otro hende cu esaki”.


ALFA su mira pa futuro
Sr. Kelly a elabora cu ALFA lo kier mira un Pride bon organisa manera tin na Corsou na
Aruba tambe. “Un marcha y otro eventonan ta na su luga na Aruba. Particularmente si
haci esaki conhuntamente cu famianan nos por demostra cu nos ta den un lucha pa haya
reconocemento di nos derechonan”. Pa yega na esaki sr. Kelly ta kere ta importante
ta pa keda den bista di pueblo, sea den radio of riba television. Tambe ta importante pa conscientisa hobennan riba topico di sexualidad. Cu cambio di gobierno, sr. Kelly a bisa cu
mester bay papia cu e prome minister nobo y parlamentarionan cu lo drenta. “No solamente pa enfoca riba loke tabata e enfoke pa ultimo tempo, pues matrimonio entre parehanan di mesun sexo. E no ta bay specificamente pa e matrimonio, loke ta importa ta e derechonan. E ta trata di tin mesun derecho cu otro ciudadanonan”.

Esaki ta algo cu sr. Kelly a enfrenta na nivel personal, mirando cu un tempo pasa su casa
a fayece. “Mi no ta haya ningun pensioen. Nada. Te hasta mi a haya problema cu Servicio
di Impuesto, mirando cu nan no ta reconoce mi matrimonio. Pro den nan wowo si nan
ta haya cu mi a biba cu un persona y cu ami mester paga cierto cosnan p’e”.

Diferencia entre Corsou y Aruba
Sr. Kelly a nota cu despues di biba 15 aña na Aruba, e ta haya cu na Corsou e discriminacion ta mas visibel. “Tur caminda cu bo bay si hende haya cu bo ta cana di un manera diferente of algo otro, nan ta yama bo den bo cara
m*ric*”. Aunke porta e situacion di discriminacion na Corsou lo ta mas pisa, sr. Kelly ta kere cu na Aruba e ta tuma otro forma. “Na Aruba bo no ta wak cu nan ta bisa bo den bo cara, pero nan ta uza hopi biaha social media manera Facebook pa papia tras di bo lomba. Esaki ta haci’e mas dificil. Si bo haya un discriminacion den bo cara por lo menos bo por confronta e persona y puntra kico ta haci bo menos cu nan”. Pa finalisa Sr. Kelly a expresa cu e islanan den Caribe Hulandes mester uni nan forsa pa trece cambio den e situacion di derechonan igual pa comunidad LGBT.