Pa e di 27 aña consecutivo segun organisacion di Miss Gay Aruba, a corona e reina cu e titulo di e mesun evento aki unda comunidad tanto LGBT+ como heterosexual cu ta apoya nan ta bin hunto pa un anochi di farandula. E aña aki Miss Gay ta Kharim Cohen.

Maske esaki ta di 27 aña cu e evento aki ta andando, no por laga afo un reflexion riba dicon e evento aki ta existi. Den combersacion cu organisadonan, ora nos reportero a presenta na e evento, a haya tende cu mayoria medio local no ta bon bini mas na Miss Gay, pa via di e mal publicidad y comentarionan negativo cu nan cobertura ta trece. Despues di aclara e intencion pa cubri e evento, organisadonan a duna nos reportero acceso, maske no sa haci esaki mas pa medionan.

Ta di mesun manera Toine Van de Donk, despues di e shownan di e 5 candidatanan Ana Paula Kiera, Amber Haze, Kristina Oelhers, Kharim Cohen y Kimora Lee Jones, a gradici Aruba pa apoya su negoshinan bou cual ta cay Club 7 y Monastery, pero despues di menciona cu e personalmente a haya hopi menasa via medionan social posiblemente pa ta abiertamente homosexual of duna servicio na personanan abiertamente LGBT+ den nos comunidad cu su negoshinan.

Maske e evento ta enfoca riba transformismo, cual ta algo cu mas y mas ta birando popular rond mundo cu shownan manera Rupaul’s Drag Race, semper e lo ta algo cu ta conecta cu e lucha pa derecho y aceptacion di comunidad LGBT+ na Aruba. Ultimo biaha Bon Dia Aruba a cubri e evento unda a presenta e candidatanan, enfocando riba e grupo cu posiblemente menos proteccion bou e capa LGBT+, esta personanan transgenero. E biaha aki a entrevista personanan heterosexual pa duna un bista riba dicon nan ta bay e evento aki.

Respet pa persona cu ‘tin durf’ di admiti ken nan ta.
Un di e personanan cu tabata fungi como hurado durante e anochi, Astrid Croes, nada desconoci den eventonan di Carnaval, a conta Bon Dia cu esaki tabata su prome biaha como hurado, despues di hopi aña di bay e evento. Pa e veterano aki di Carnaval, Miss Gay no ta trata di beyesa femenino solamente. “E ta algo masha bunita pa bo experiencia den un anochi e trayectorio di cada candidata y kico nan por haci, pasobra bo mes sa, nan ta wordo bringa masha hopi mes. Ami no tin nada contra y semper tabata pro e comunidad aki, pasobra nos tur ta yiunan di Dios.”

Croes, cual ta consciente di e situacion di desigualdad cu personanan den comunidad LGBT+ ta haya nan mes den dje na Aruba, sinembargo tin fe cu e situacion lo bay cambia despues di tempo, ora tin aceptacion completo. “Mi ta kere cu poco poco nos lo yega na e areglonan, pasobra tur hende ta ser humano. Cu un tiki pasenshi mi ta sigur nan lo logra”. Croes lo por tin rason, si e mandatario encarga cu husticia cumpli e promesa cu a haci den conferencia di prensa pa laga union civil registra yega parlamento pa fin di aña.

Combersando cu un hoben, Ivan Werleman, kende tambe ta loke ta yama den e terminologia di e comunidad, un ‘straight ally’, e hoben ta conta cu e ta bay e evento di Miss Gay Aruba pa asina apoya e comunidad aki, mirando cu e tin hopi persona den su famia cu ta forma di un of otro manera parti di e comunidad aki. Werleman tin respet pa e personanan cu ta durf pa expresa nan mes, pasobra no semper esaki ta facil. “No ta tur hende tin e durf di bisa cu ey mi ta gay. Semper mi ta apoya nan. Pasobra si ta cu nan ta sinti nan mes macho macho di paden, of muhe muhe, tur hende tin cu aprecia loke nan ta di paden. Paden ta loke ta conta”.

 

 

Comments are closed.