Diadomingo awor 26 di februari e comunidad di Republica Dominicana na Aruba ta bay celebra e dia di nan independencia y di bandera cu un actividad chikito na unda nan ta invita comunidad di Aruba en general pa participa den esaki.
Pa celebra un dia den famia e comunidad di Dominicanonan cu ta haci bida na Aruba a informa cu manera nan ta bin haciendo for di algun añanan caba nan kier celebra e dia aki cu un actividad cu ta bay cuminsa 10or y mey di mainta na Carnaval Village na San Nicolas y despues nan ta bay bin hunto na Plasa Juan Pablo Duarte cu ta ubica na Van Leeuwenhoekstraat na Playa.
Aunke e dia 27 di februari ta e dia oficial di Independencia di e pais aki nan ta bay celebr’e diadomingo awor cu e actividad aki pa disfruta hunto den famia.
Esaki ta un dia importante pa e comunidad dominicano ya cu den e pais aki ta e celebracion patrio di mas grandi cu nan ta haci, un 27 di februari di 1844, Juan Pablo Duarte un politico y militar cu a funda Republica Dominicana hunto cu un sociedad secreto a proclama independencia di e pais aki.
E manera di mas tipico cu nan ta celebra e dia na nan pais ta haciendo desfilenan cu ta recore varios ciudad di e isla na unda tambe ta haya desfile militar di miembronan di Forsa Arma cu ta luci nan uniform y por wak e tankinan recoriendo e cayanan cu tambe ta uni na e fiesta aki.
