Ayera mainta na Plaza Juan Pablo Duarte a tuma luga e celebracion di 180 aniversario di independencia di Republica Dominicana y dia di nan bandera na unda diferente personanan, entre consul y ministernan a reuni pa duna nan palabra di pabien pa e dia historico aki.

Den e caso aki, Luis Eludis Perez Delgado, ken ta consul di Republica Dominicana na Aruba, a splica cu ayera tabata un dia special unda nan tabata brasa otro bao e simbolo patrio cu ta e bandera nacional, “y e orguyo ey ta pone mi sinti cada biaha mas comprometi cu mi comunidad. Ta un orguyo cu awe mi ta comparti cu nan pa mi por brinda miho calidad den servicionan cu nos ta duna na isla di Aruba. P’esey nos ta bay brinda lo miho di nos pa e bienestar di e comunidad dominicano na isla di Aruba,” el a sigura.

Di su parti, minister di Integracion, Labor y Energia, Glenbert Croes tambe tabata presente na unda a expresa cu den dia aki tambe e ta sinti su mes dominicano, celebrando e 180 aniversario di independencia di Republica Dominicana. “Nos ta sinti hopi orguyo y sentimento di hermandad y solidaridad dominicano celebrando, pasobra un dia manera 25 di januari y un 18 di maart, tambe e Dominicanonan ta celebra cu nos e dianan nacional como Arubianonan. Ta vale la pena resalta cu e celebracion aki na Aruba ta destaca a traves di e plasa y e ceremonia, importancia cu pueblo dominicano ta bin di ta den e proceso y desaroyo di Aruba, nan a integra manera otro pueblonan, nan a aporta pa e progreso di nos pais y p’esey den un dia como awe tambe a mi kier a resalta nan historia di haci 180 aña pasa pero tambe e historia mas reciente.”

Minister Croes a finalisa bisando cu pa loke ta trata un acuerdo cu ta bay firma dia 13 di maart, na Aruba tin hende cu ta traha cu permiso manera ta yama nan “gestor” cu ta di bon boluntad, pero tin otronan cu a abusa di ciudadanonan stranhero cu a bin Aruba. Awor cu e asociacion di tur consulado na Aruba cu Ministerio di Integracion a firma un protocol pa ciudadanonan por bay na consulado di nan pais pa yuda y guia nan y asina evita “cay den sombra di e maldad cu ta acompaña cierto gestornan.”

Potretnan ta pertenece na Facebook di minister Glenbert Croes.