Cu e presencia di un grupo di e comunidad di Dominicanonan na Aruba conhuntamente cu e vice-consul di Republica Dominicana, Consul di Colombia na Aruba y representantenan di diferente partidonan politico ayera mainta na Plasa Juan Pablo Duarte na unda yena cu hopi orguyo nan a sinti di celebra e dia aki.
Republica Dominicana tabata goberna pa Haitianonan e cual ta e pais bisiña di nan pa un tempo di 22 aña, manera e vice-consul Luis E. Perez a sigura, “danki na idea libertador di e patriota Juan Pablo Duarte e cual a funda un asociacion secreto yama ‘Los Trinitarios’ a desplega diferente accion a cuminsa tuma e pasonan di independencia cu a caba e dia 27 di februari di 1884 cu e ‘Trabucazo’ na e porta di Misericordia,” el a sigura.
Esey pa nan ta mas cu un orguyo y un honor na unda nan por a sali di e situacion ey na unda awe nan por hisa nan bandera tricolor danki na e patriotanan ey.
Di su parti, Winston Tavarez presidente di e fundacion Dominicana Arubanse Juan Pablo Duarte a señala cu pa su persona ta un honor cu ayera nan por a logra haci un acto simpel pero cu hopi sentimento patriotico na unda nan ta gradici tambe na comunidad Arubiano y na e isla Aruba cu nan ta considera como nan segundo patria.
Presidente di Partido Revolucionario Dominicano na Aruba, Edward Mac Collum a señala cu na Aruba e diferente partidonan politico dominicano a reuni como rumannan manera el a sigura, pa intercambia ideanan como representantenan digno “hende homber y hende muhe di trabou.”
Carlos Ozuna representante di e partido Fuerza del Pueblo cu tambe tin su sede na Aruba a expresa cu ayera tabata apropia e momento pa invita na tur nan conciudadano pa no lubida riba e fecha aki y asisti masivamente na e actonan protocolar pa demostra cu e “Dominicanonan ta hende bon, hende uni y trahado.”
