Ayera mainta consul di Filipinas, Ami Henriquez-Mendez a organisa un Santo Sacrificio di Misa na Parokia Santa Anna di Noord pa conmemora e di 122 aniversario di independencia di nan pais. Tambe tabatin oportunidad pa comparti cu gastronomia y cos dushi tradicional di Filipina na Centro Don Bosco
E misa aki a wordo celebra pa pastoor Santiago y el a conta cu presencia di Prome Minister, Evelyn Wever-Croes y su casa. Tambe tabata presente algun miembro di e cuerpo consular, comunidad Filipino y parokianonan di Misa Santa Anna.
E diplomatico y representante di e comunidad di Filipinas na Aruba a bisa na Bon Dia Aruba cu e biaha aki e acto di conmemoracion di nan dia di independencia a bay diferente. Pasobra nan no por a haci’e na Wilhelmina Park, manera nan a bin ta haciendo durante e ultimo añanan. Nan a dicidi di ofrece un misa di gradicimento no solamente den cuadro di nan 122 aniversario di nan independencia, sino cu Aruba a logra di ta un pais ‘Covid free’.
P’esey nan a bin cu e misa aki, pa gradici hunto cu e comunidad Filipino, principalmente esunnan cu ta traha riba tereno di enfermeria. Consul Henriquez-Mendez a bisa cu e biaha aki, nan conmemoracion di 122 aniversario di independencia tabata hopi emocional. “Pasobra nos Prome Minister, un señora cu a traha duro pa nos pais, el a bin pa compaña nos,” el a bisa. El a expresa den nomber di su paisanonan palabra di danki pa henter Aruba.
Di su banda, Wever-Croes a remarca tambe cu tur aña e fecha di independencia di Filipinas ta wordo celebra na Wilhelmina Park cu un acto protocolario y cu nan baile tipico y muestra di nan folklore, cu tambe nan ta disfruta te hasta baila. Pero ayera tabata un celebracion diferente, pero no menos importante.
E mandatario ta considera cu e biaha aki e celebracion a bira ainda mas importante, pasobra nos tur tin un sentido di gratitud, despues di tur loke nos a pasa aden. “Esey ta loke mi a expresa den nomber di gobierno di Aruba. Gratitud na e comunidad Filipino cu a laga nan famia y nan hogar bin di hopi leu y yuda nos den nos economia,” el a bisa.
Premier Wever-Croes a indica cu e comunidad aki ta activo practicamente den tur sector di nos economia, pero specialmente den cuido, caminda nos mester di nan aworaki cu nos ta pasando den un pandemia. Igualmente e mandatario a yega di expresa den un discurso cortico na final di misa, cu e calor humano cu e Filipino tin y nan cultura a permiti cu nan por convivi cu esun di nos.
E ta haya cu un dia manera esun di ayera cu e comunidad Filipino a conmemora su independencia, ta invita nos reflexiona riba nos comunidad. Na Aruba tin mas cu shen diferente cultura cu ta biba hunto y pacificamente. “Cu respet pa otro y esey ta algo cu nos mester ta hopi orguyoso di dje,” el a declara. E mandatario a manda un pabien pa henter comunidad Filipino, pero specialmente un danki pa yuda nos na Aruba.
