Diasabra anochi, Aruba completo a keda sin coriente. Esaki tabata apenas un siman despues di e ultimo blackout cu a afecta varios parti di e isla, loke a genera disgusto y inconveniencia na e comunidad.

“Alrededor di 8:12 p.m. Aruba henter a keda sin coriente”, NV Elmar a informa den un comunicado di prensa.
“Mesora ELMAR a cuminsa mobilisa tur tecnico pa asina ta pendiente di e situacion. Nos a ricibi informacion pa 8:29 p.m. for di WEB cu un interupcion den produccion di coriente den planta di WEB a causa un black-out. For di e momento aki nos tecniconan tabata den comunicacion constante cu WEB.”

For di e momento ey, riba rednan social henter comunidad tabata buscando informacion como tambe purbando di compronde e magnitud di e blackout, ya cu tur bario tabata afecta. E critica tabata pisa riba rednan social, mirando cu interupcion di coriente ta algo frecuente den ultimo simannan. Ciudadanonan a expresa nan frustracion, por ehemplo, bisando: “Pero caramba hasta cuando, ken nos tin cu reclama [esaki]…pero tur dia un of dos distrito ta cay abao, ban ta serio.” Otro ciudadano a post riba pagina di NV Elmar: “Kiko Elmar mes ta pensa di e prijs-kwaliteit verhouding di nan producto?” Mayoria di ciudadano sinembargo tabata expresa preocupacion pa e frecuencia di interupcion di suministro di coriente y e problemanan cu esaki por causa na hogarnan. Ciudadanonan a expresa preocupacion si cuminda ta bay daña den frigidaire, si aparatonan electrico ta bay daña door di e fayonan den coriente, y si e interupcion di coriente ta afectando actividadnan comercial.

“Pa 9:10 p.m. nos tecniconan tabata staciona na nos onderstationnan y pendiente pa WEB reestablece produccion di coriente pa asina nos por cuminsa suministra coriente back. Pa mas o menos 9:22 p.m. ELMAR a wordo notifica door di WEB cu por a cuminsa suminstra coriente back den algun area”, NV Elmar a relata den nan comunicado. “Durante henter e proceso aki ELMAR a keda monitoria e stabilidad y suministro di coriente. Pa 9:35 p.m. suministro di coriente a ser reestableci den e area di Avenida Milo Croes, Kooyman y vecindario.”

Sinembargo, segun a indica, “pa 9:39 p.m. a surgi un biaha mas un problema den e planta di WEB cu a ocasiona un di dos black-out. Nos tecniconan a keda ‘stand-by’ pa asina cu WEB soluciona e problema, nos por sigui suministra coriente back.” Esaki atrobe a trece cune ola di critica y consternacion riba e puntonan menciona.

“Pa 10:01 p.m. a cuminsa suministra coriente den e area di Balashi, Savaneta Zuid y vecindario. Pa 10:03 p.m. a cuminsa suministra coriente den un parti di Santa Cruz. Pa 10:06 p.m. suministro di coriente a ser reestableci den e area di Balashi, Pos Chikito, TeleAruba, Santa Cruz, un parti di Savaneta y vecindario. Pa 10:23 p.m. a cuminsa suministra coriente den e area di Hospital, Bubali, un parti di Palm Beach, La Cabana y vecindario. Pa 10:25 p.m. suministro di coriente a ser reestableci den e area di Paardenbaai, Punta Brabo, Manchebo, Schelpstraat y vecindario. Pa 10:46 p.m. a cuminsa suministra coriente den e area di San Jose, Arawak, Palm Beach y vecindario. Pa 10:51 p.m. suministro di coriente a ser reestableci den e area di Airport, Garage Cordia, PriceSmart, CMart y vecindario. Pa 10:57 p.m. suministro di coriente a ser reestableci den e area di Moko, Paradera y vecindario. Pa 11:03 p.m. a cuminsa suministra coriente den e area di Keito, un parti di Noord, Washington y vecindario. Pa 11:04 p.m. suministro di coriente a ser reestableci den e area di Tanki Leendert, un parti di Oranjestad y vecindario. Pa 11:07 p.m. suministro di coriente a ser reestableci. Aruba henter tabata tin coriente back”, Elmar a relata.

Pero asina mes, atrobe “pa 11:38 p.m. nos a confronta un interupcion den e distribucion di coriente na un parti di e area di Seroe Blanco. Di biaha nos tecniconan a mobilisa pa atende cu esaki. Pa 4:03 a.m. suministro di coriente a ser reestableci den e area di Seroe Blanco”, segun Elmar mes ta conta.

“ELMAR a percura pa provee ‘updates’ continuo via nos pagina di Facebook pa mantene e comunidad di Aruba bon informa. ELMAR su team completo a traha incansabel pa atende cu e situacion di black-out y reestablece suministro di coriente back na Aruba. Nos ta gradici nos tecniconan pa nan dedicacion. ELMAR ta gradici e comunidad di Aruba pa e pasenshi durante e interupcion den produccion di coriente cu tabata fuera di nos alcance”, e comunicado ta finalisa bisando.

Sinembargo, no a duna un splicacion claro riba kico precies ta e problema cu ta bin ocasionando interupcion di coriente, principalmente riba diasabra. WEB di su banda a limita na bisa cu “un fayo den plantanan di WEB” a ocasiona e blackout, lagando comunidad cu cantidad di pregunta. Comunidad a puntra entre otro si ta falta di inversion, fayonan tecnico pasobra mester upgrade of mester personal mas capacita, of hasta si ta trata di un forma di sabotahe.

Ta spera cu den proximo dianan ta bay tin mas claridad riba e situacion.