Ayera 20 di juli ta e dia cu Colombia ta conmemora su 211 aña di independencia na unda cu nan a haci un acto protocolar chikito cu a conta cu e participacion di ‘Asociacion de Amigos de Colombia’ y otro organisacionnan.
Moises Fernandez presidente di e asociacion a trece dilanti cu aunke tabata un acto conmemorativo senciyo tabatin hopi sentimento y emocion, esaki ta e di dos aña consecutivo cu nan ta realisa e celebracion aki na e Plasa di Gradicimento, un icono pa e comunidad Colombiano na Aruba.
E acto a conta tambe cu e participacion di minister demisionario di Asuntonan Social y Labor Glenbert Croes asina como otro asociacionnan como esun di Venezuela ‘Vene Aruba Solidario’, ‘Asociacion di Fiestas Patrios’ di Peru y di Republica Dominicana ‘Asociacion Juan Pablo Duarte’ cu a reuni pa duna apoyo y colaboracion entre nan pa traha hunto pa asina nan por proyecta mas pa representa e comunidad Latino na Aruba.
Asina mes, el a anuncia cu mañan 21 di juli for di 7or di anochi lo tuma luga un santo sacrificio na Misa di Birgen di Fatima di Dakota, ademas el a informa cu dia 1 di augustus nan lo haci un actividad di integracion manera Fernandez a bisa pa asina comparti cu famia y duna support na esunnan cu kier promociona y bende nan productonan.
Pedro Ventura consul di Republica Dominicana na Aruba a menciona cu semper Colombia y Republica Dominicana tabatin un excelente relacion y awe cu Colombia a cumpli 211 di independencia nan ta contento di forma parti di e celebracion aki cu ta hopi importante pa Colombia.
