Comunidad Chines tin comprension pa medida preventivo pa evita Coronavirus

E casonan nobo di Coronavirus (COVID-19) raporta den otro paisnan diferente na China ta haci cu Organisacion Mundial di Salud (WHO) a pidi pa e paisnan cuminsa prepara y reforsa nan medidanan di prevencion y alerta, premirando cu lo bin un potencial pandemia di e virus aki.

Na Aruba no a registra oficialmente niun caso di e virus aki, cu a wordo descubri na fin di luna di december den e ciudad Chines di Wuhan. E unico hecho cu a tuma luga relaciona cu e virus aki tin di haci cu cuater miembro di un famia cu a bin for di China, despues cu nan a bay celebra Aña Nobo Chines. A pone nan den cuarentena como un medida exclusivamente preventivo. Pero despues cu nan a cumpli dos siman den cuarentena, nan ta hiba un bida normal den comunidad, manera Departamento di Salud Publico (DVZ) a yega di informa.

Bon Dia Aruba a papia cu presidente di Chinese Club of Aruba, Sr. Williamn Cheng kende ta representa e comunidad aki na Aruba. El a laga sa cu nan ta respeta e medidanan di prevencion cu a keda introduci pa evita e presencia di e Coronavirus na Aruba. Chinese Club of Aruba ta haya cu no tin niun racismo ni discriminacion riba e medidanan cu gobierno di Aruba a introduci pa preveni e presencia di e coronavirus.

Cheng a laga sa cu gobierno Chines a bin cu control pisa pa e virus aki, cu a keda descubri na Wuhan, no plama den henter pais di China, y tampoco den henter mundo. “Nan a cera full e ciudad pa tin un miho control,” el a bisa. Te hasta tin caso di pashent cu a keda interna den hospital, y despues cu nan a cura, nan a bay cas sin problema.

Actualmente ta calcula cu na Aruba ta existi un comunidad di 4 mil Chines. Mayoria di nan ta bin for di e region sur di China, esta Canton. Mientras cu Wuhan ta un ciudad central hopi leu –casi 2 ora cu avion – for di Canton, caminda e mayoria di Chines di Aruba ta bini. Pues nan ta haya dificil cu for di China mes por bini un persona cu e virus pa Aruba.

“E persona cu ta sali di China pa bin Aruba, mi ta sigur cu nan ta saludabel,” el a bisa. Ademas e ta haya cu e situacion climatico di nos region di hopi solo y biento ta crea un escudo pa evita cu e virus aki lo por plama facil, manera si ta sosode den clima friu.

A pesar di esaki, presidente di Chinese Club of Aruba a declara na Bon Dia Aruba cu nan ta duna rason na gobierno di Aruba. Nan ta compronde cu e tipo di medida preventivo aki, manera e cuarentena, ta dirigi pa evita cu nos comunidad ta wordo contagia. Ademas e personanan cu a wordo poni den cuarentena tambe a bay di acuerdo cu e medida aki, prome cu nan a bin Aruba.

Igualmente Chinese Club of Aruba a aprecia cu prome cu gobierno di Aruba a bin cu e medida preventivo aki via su departamento di Salubridad Publico, nan a tuma contacto cu nan asociacion. Esaki a haci cu nan por a comunica cu nan miembronan, kendenan tambe a comunica cu nan famia cu a bay China.

Di e forma aki nan por a haya un idea di e situacion y algun di nan a tuma e decision pa prolonga nan biahe pa bin Aruba. Tambe nan a comunica cu gobierno di Aruba, ya cu hopi di nan paisanonan ta bou permiso di estadia y trabou pa den caso cu nan estadia ta prolonga mas tempo na China, y si nan permiso por caduca, pa nos autoridad competente tene consideracion cu e situacion aki.

Prevencion

Stephen Chen, kende ta assistent di e presidente di Chinese Club of Aruba, a bisa cu e topico aki ta un poco ‘sensitivo’. Pero poniendo particularmente e bienestar di comunidad Chines y generalmente e bienestar di pais Aruba, ‘nos tur a compronde cu Aruba ta depende ariba turismo’. Ya cu turismo ta basicamente nos unico pilar economico y como asociacion Chines nan ta parti di Aruba tambe. “No tin niun racismo. Nos tur a compronde pasobra nos tur kier haci’e pa bienestar di Aruba,” Chen a bisa.

Chinese Club of Aruba ta elogia e hecho cu gobierno regularmente pa medio di su departamento di Salubridad Publico ta bin cu informacion corecto pa nos comunidad.

Mientras cu ainda eventualmente lo bin mas medida preventivo contra e Coronavirus, ya caba den otro ciudadnan di mundo esakinan ta tumando luga pa medio di campaña masivo, entre nan na aeropuerto y sitionan publico.

Ta recomenda entre otro un bon higiena di man, kiermen laba bo man cu awa y habon regularmente y uzo di mask. Pero tambe nan ta campaña cu ta busca kibra cu cierto mito pa falta di informacion manera: No ta berdad cu tur persona Chines of esunnan cu tin rasgonan Chines tin Coronavirus. No ta berdad cu si bo ta consumi cuminda of producto for di China bo ta core riesgo di haya e virus aki. Tampoco ta berdad cu tur hende cu ta bin for di China ta contagia cu Coronavirus.