Presidente di Club China na Aruba, William Cheng a laga sa cu nan a logra colecta e bunita suma di 50 mil dollar cu nan a manda ayera pa China.
Ta asina cu nan conciudadanonan residencia na Aruba a duna nan colaboracion pa yuda alivia e situacion cu e pais Asiatico ta pasando aden debi na e Coronavirus. Nan ta calcula cu e comunidad Chines na Aruba ta alrededor di 4 mil hende cu a dicidi di yuda nan paisanonan den nan pais di origen.
Igualmente ariba su mes Sr. William Cheng a cumpra 150 mil mask fabrica na Brasil como un donacion, ya cu na China mes tabatin scarsedad di nan. Esaki ta un forma cu nan como comunidad Chines na Aruba ta mustra nan solidaridad cu e situacion cu China ta pasando aden pa motibo di e Coronavirus. Pero nan ta hayando mas noticia positivo riba remedi efectivo pa contraresta e virus aki, y tambe cu mas fabrica a cuminsa habri bek.
Stephen Chen kende ta assistent di Sr. William Cheng a bisa cu e ayudo monetario aki ta wordo canalisa via e Consulado General di China estableci na Corsou. Despues e donacion aki ta bay pa un instancia local, manera un Cruz Cora, pero su base ta na Canton. Entre nan mes a evalua cu hopi di e donacionnan rond mundo ta bayendo pa e ciudad mas afecta cu ta Wuhan, mientras cu e ciudadnan rond di dje ta haya menos atencion.
P’esey nan a dicidi di manda e donacion na un instancia situa na Canton mes pa brinda ayudo na e ciudadnan rond di Canton. Tambe e donacion aki lo yuda alivia e situacion economico di Canton y bisindario, ya cu den e area aki ta opera mayoria di e fabricanan cu nan produccionnan a baha pa causa di e Coronavirus.
Nan ta consciente cu nan paisanonan na China mester di mas ayudo, pero for di Aruba e comunidad Chines ta haci su best pa brinda su ayudo na China.
