Unabes cu e prome lote mask a yega Aruba, presidente di e Club Chines y Asociacion di Comerciante Chines na Aruba, William Cheng a dicidi di entrega nan como donacion pa pais Aruba, via minister Xiomara Maduro. E ta un cantidad inicial di 11 mil mask pa esnan cu ta den e prome linea di e pandemia aki, specialmente polis. Nan ta mask anti virus, pero nan no ta mask profesional pa hospital.

Igualmente, el a declara na Bon Dia Aruba cu nan kier mustra nan solidaridad cu henter comunidad di Aruba. Nan a yega di cera un fondo pa bin cu dos container di cuminda for di Hulanda. Nan a colecta alrededor di 90 mil florin pa bin cu e dos container aki, un ta bin fin di luna awor, y otro durante e prome siman di mei venidero. Ya caba Club Chines y Asociacion di Comerciante Chines na Aruba a tuma contacto cu Fundacion pa Nos Comunidad, caminda e fundacion lo manda un team di 10 persona na nan club pa reparti nan. E fundacion aki tin un lista di pa esnan den mas necesidad actualmente.

“E problema actual no ta conta pa nos so, e ta conta pa tur,” William Cheng a declara na e matutino aki. El a bisa cu nan deseo ta pa no tin mas bida perdi den henter mundo pa causa di e Covid-19, pasobra nos mester di tur hende.

Donacion.
Ta asina cu comunidad Chines na Aruba a yega di manda un donacion di 50 mil dollar pa yuda China durante e inicio di e virus aki. Despues China mes a dicidi di manda 30 mil mask como regalo na e comunidad Chines na Aruba, specialmente esunnan cu a duna placa pa manda e donacion. Nan ta mask cu a bin for di diferente parti di China. Nan a tarda pa yega Aruba, pasobra nan mester cumpli cu cierto exigencianan.

El a reacciona riba cierto comentario cu ta core rond. El a bisa cu e mask aki ta di bon calidad, y e ta wordo traha specialmente pa evita virus entre hendenan. Entre otro bo por uz’e ora cu bo ta sali pa abastece bo mes di alimentonan. Pero e no ta un mask special of profesional pa uzo di hospital.

El a referi cu na Hulanda a wordo divulga informacion cu e mask fabrica pa China tabata di mal calidad. Cheng a aclaria cu un compania di Hulanda a cumpra nan for di un empresa priva di China, y nan tabata pa proteccion so, pero no pa uza nan den hospital. Mientras cu e mask uza pa hospital tin mas exigencia, ya cu bo ta traha cu hende cu tin e virus of otro malesa. Awor tur mask cu ta wordo produci ta para riba dje pa ki sorto di uzo e ta, el a bisa.

Tambe tin otro lote di mask cu ta biniendo Aruba y nan lo entrega nan como donacion na e centro di cuido, unda nan lo bay parti’e pa esunnan cu mester di nan. Ningun di e mask aki ta pa bende, sino pa entrega nan como regalo, asina el a bisa. Es man algun di nan lo wordo entrega ora cu bo ta drenta un supermercado Chines.