Recientemente, un ciudadano a acerca Bon Dia Aruba pa expresa su preocupacion pa e tardansa cu tin pa habri e Bureau Ombudsman pa publico. Den un reaccion, Bureau Ombudsman a splica cu ainda nan ta den e fase preparatorio.

Sra. Marietje, un ciudadano di Aruba, a conta cu el a nota diferente problema social y economico na Aruba, y cu kier a trece esakinan na atencion di Ombudsman, Sra. Jurima Bryson. Sinembargo, Bureau Ombudsman no a habri su porta ainda, y pa e motibo aki, tampoco nan por cuminsa ricibi keho of informacion for di pueblo. Esaki, Sra. Marietje ta considera inaceptable, ya cu e ta considera e asuntonan cu e kier trece dilanti como algo hopi urgente. Y como cu e no a haya oido cerca Ombudsman, Sra. Marietje a dirigi na Gabinete di Gobernador.

Den un carta cu Sra. Marietje a manda pa Gobernador, Su Excelencia Alfonso Boekhoudt, el a bisa:
“Dia 1 di october 2024, Sra. J. Bryson a keda nombra como Ombudsvrouw di Aruba. Esta un momento historico bunita, mi a pensa. Sinembargo, despues a bin e hecho tristo cu e Ombudsvrouw ainda no a habri porta di su oficina pa publico!” Sra. Marietje ta considera cu ya ta casi 7 luna desde cu Sra. Bryson a huramenta, y ta tardando demasiado pa habri porta di e Bureau importante aki.

Den su carta, el a puntra “Kico ta e berdadero motibo cu Ombudsvrouw di Aruba no por of no kier habri su portanan pa publico?”, enfatisando cu e situacion ta preocupante pa su persona.

Sra. Marietje ta cuestiona pakico no por habri un loket of balie mientras tanto, cu por cuminsa ricibi e cartanan y archiva esakinan, asina dia e Bureau habri su porta, nan por cuminsa trata nan.

Huramentacion di Ombudsman di Aruba
 Dia 1 di october 2024, Presidente di Parlamento na e momento ey, Raymond Kamperveen a ehecuta e huramentacion di Ombudsman, indicando cu conforme cu articulo 5 di ordenansa di Ombudsman, Parlamento di Aruba ta e organo cu ta nombra e Defensor di Pueblo pa Aruba.

Den un reunion publico di dia 8 di juli 2024, Parlamento di Aruba a dicidi di nombra Mr. Jurima A.R. Bryson pa asumi e puesto menciona di Defensor di Pueblo di Aruba, esta Ombudsman, y conforme esaki el a keda huramenta na parlamento prome cu asumi su funcion.

“…pero awor e trabounan ta bay cuminsa, awor nos ta bay haci e tarea cu nos mester haci pa institui e behoorlijkheidsnormen, e reglanan pa nombra Kinderombudsman, pa tuma personal, pa haci tur cos posibel pa e instituto por cuminsa cana,” el a sigura, na e momento. El a indica tambe cu no por duna un fecha exacto ki dia e instituto ta bay habri su porta pa publico, “pero mi ta compromete mi mes si pa traha incansablemente pa e termino cu nos ta bay den start up, pa ta mas cortico posibel. Pero no ta tur cos ta depende di mi so. Tin un trayectorio pa cana, cosnan pa regla prome cu e instituto aki por habri su porta. Esey ta nifica cu nos tin cu haci tur e pasonan corecto pa nos por yega eynan.”

Pa por nombra un Kinderombudsman, Bryson a sigura cu e ley ta prescribi cu nan ta haci un nominacion y e ora ey Parlamento di Aruba lo bay nombr’e,igual cu a sucede cu Bryson.

Tocante e motibo pakico Ombudsman ainda no por cuminsa tuma keho, Bryson a bisa na october cu ta pasobra na Aruba, no ta trata di un continuacion di un instituto cu tabata existi caba, manera si ta e caso na e otro paisnan den Reino. Esaki ta nifica cu Bureau Ombudsman na Aruba ta cuminsa for di cero.

Bureau Ombudsman ‘consciente cu tin hopi interes di parti di pueblo’

Bon Dia Aruba a tuma contacto cu Bureau Ombudsman pa haya clarificacion riba e proceso. Bureau Ombudsman a reacciona bisando cu nan ta consciente cu tin hopi interes di parti di pueblo pa por haci pregunta y/of entrega keho na Bureau Ombudsman. Alabes, nan ta hopi agradecido pa e comprension di parti di pueblo pa duna espacio pa haci e trabao cu ta necesario den e fase preparatorio.

Bureau Ombudsman alabes a sigura cu “tan pronto cu e momento yega cu por habri porta di Bureau Ombudsman y asina cuminsa ricibi preguntanan y/of kehonan, nos lo anuncia esaki via nos medionan di comunicacion.”

Tardansa den e proceso ta normal
 Ta comprendibel cu pueblo ta contando e dianan prome cu por entrega pregunta of keho cerca Ombudsman, mirando cu a dura añas prome cu esaki finalmente a keda introduci na nos pais, y tin un cantidad di asunto social y economico cu ta urgente pa atende. Sinembargo, investigacion di Bon Dia Aruba ta mustra cu e tardansa den e proceso di preparacion prome cu Ombudsman habri su porta ta algo normal.

Manera Sra. Bryson a splica na october, e diferencia entre e Ombudsman na Aruba compara cu esunnan na Hulanda, Corsou y Sint Maarten, ta cu esun na Aruba ta bay cuminsa como e prome Ombudsman, mientras cu esunnan na Hulanda, Corsou y Sint Maarten ya tabatin e Bureau funcionando na momento cu nan a keda nombra.

Por ehemplo, Corsou a nombra su prome Ombudsman na 2003. Pa 2015, ora Sr. Keursly Concincion a keda nombra, e Bureau ya tabata funcionando pa algun aña caba, y pues e periodo entre e nombramento y e inicio di su trabao tabata cortico.

Na Sint Maarten, a establece e institucion di Ombudsman na 2010. E di dos Ombudsman, Gwendolien Mossel, a keda nombra na november y huramenta na december 2018, cu su termino cuminsando na januari 2019. Aki tambe por nota cu e periodo ta mas cortico mirando cu e institucion ya tabata funcional.

Mundialmente, e proceso di preparacion prome cu e Ombudsman habri su porta pa publico, normalmente tin un duracion averahe di un aña; tin algun a yega di dura hasta tres aña den e fase preparatorio.

Mientras tanto, Bureau Ombudsman tin vacatura riba su rednan social pa haya e personal necesario pa por cuminsa opera debidamente.