Ayera mainta, comunidad di Aruba a haya e oportunidad di por bishita diferente monumento pa asina explora e historia y e bunita arkitectura di 13 monumento y edificionan historico den area di Oranjestad.

Bailenan, caha di orgel, musica y algun hoben cantante tabata presente den cada un di e monumento pa pone un ambiente di fiesta cu e dia aki tin unda bishitantenan for di 10 or di mainta a cuminsa drenta pa aprecia e sitionan historico.

Pa prome biaha Stichting Monumentenfonds Aruba ta organisa e Open Monumentendag den colaboracion cu Stichting Nederland Monumentenland cu ta encarga cu Open Monumentendag na Hulanda. Na Hulanda lo celebra esaki durante tres dia largo pero na Aruba lo ta diadomingo 15 di September.

E publico a registra na e monumento di Casita Geel y for di akinan cuminsa nan recorido den Oranjestad y bishita e diferente Monumentonan, participa na actividadnan pa grandi y chikito unda tabatin e posibilidad di gana varios premio manera Weekend stay, travel vouchers, sunset sails, dinners y hopi mas.

Muchanan di scolnan basico a ricibi un Monumentenfonds paspoort unda cu ora na tabata bay bishita e diferente luga nan tabata haya un stempel y na final di actividad a yega na Postkantoor ken tambe a duna rondleiding y informacion tocante historia di Post.

Hendenan tambe a disfruta di entre otro, workshop y actividadnan pa mucha, benta di artesania y cosnan tipico di Aruba, Instameets y competencia di fotografia di e proyecto di Lang Leven het Erfgoed, tournan exclusivo y hopi mas.

Puntrando riba con e experiencia aki na algun publico presente, nan a laga sa cu esaki ta un actividad basta leuk vooral pa e muchanan pa asina nan por bishita y conoce e luganan historico di nos isla, conoce un tiki mas di nan arkitectura, explora nan y bay back den pasado pa asina por aprecia por ehemplo, con nos antepasado tabata cushina of tabata biba.

Sigur un exito e actividad aki tabata pa celebra e cultura y herencia unda Dia di Monumentonan ta mas cu un festividad, ta un ocasion pa uni comunidad y honra legado di cultura di Aruba, pa esaki, Departamento di Cultura tambe tabata presente pa sostene e evento aki pa comunidad yega mas cerca di e monumentonan cual ta forma parti di Aruba su identidad.