Apenas algun siman pasa a lansa e pelicula Otro Banda di Lama riba e pagina di web di Comision Mensenhandel Mensensmokkel Aruba, esta Comision Traficacion y Contrabanda di Hende Aruba, pero esnan responsabel pa e mensahe ta contento cu publico ta responde na e storia y kier sa mas.

“Ta esey ta nos meta,” Angela Persad, coordinado di CMMA a bisa Bon Dia Aruba. “Nos a yega na casi 27 mil hende cu a mira e pelicula via diferente media, unda casi 11 mil te cu awor a sea comparti of comenta despues di a mira ‘Otro Banda di Lama. Ta trata aki di un grado di participacion di mas di 9.5 porciento. Normalmente den mercadeo, lo keda contento si e grado aki ta entre cuater a cinco porciento. Pues nos ta hopi contento cu comunidad a acepta e pelicula.”

E pelicula ta parti di un campaña grandi cu a lansa pa conscientisa tur residente di Aruba cu contrabanda di hende por conduci na traficacion di hende, y cada persona riba e isla cu haci uso di servicio di un persona cu a drenta Aruba pa medio di contrabanda ta cometiendo un delito y ta contribui na un negoshi scur y tristo unda ta abusa di derecho humano di personanan indocumenta.

Contrabanda y traficacion

E ta esencial pa compronde e diferencia entre contrabanda di hende versus traficacion di hende. Contrabanda ta e accion fisico pa transporta un persona den forma ilegal. E ta un infraccion contra ley di inmigracion di un pais. Traficacion di hende ta un infraccion contra derecho di e persona. Den ambos caso, victimanan no ta esun cu a comete e crimen.

Un victima di traficacion di hende ta un esclavo moderno, unda e no por haci uzo di su derechonan, y entre otro ta hay’e forsa pa haci trabaonan excesivo sin e pago corespondiente, ta perde su libertad, ta kita nan paspoort di nan, ta retene salario of parti di salario pa cualkier excuus y ta forsa pa tene relacion sexual sea pa produci placa of pa cierto siguridad.

E Grupo di Trabao Traficacion Contrabanda di Hende, TMMA (Taskforce Mensenhandel-Mensensmokkel) cu ta consisti di diferente actor na Aruba, cu ayudo di Hulanda a logra establece e CMMA cu ta e punto di conexion di informacion riba traficacion y contrabanda di hende.

Manera ta conoci, Hulanda a pone sumanan disponibel pa CMMA eleva e conocemento riba kico ta e fenomeno di contrabanda y traficacion di hende y con e ta afecta no solamente e derechonan di personanan envolvi, pero tambe ta afecta ciudadanonan di Aruba directamente.

Pelicula ta apenas un parti

Coordinado Nacional di e Grupo di Trabao Sra. Jeannette Richardson Baars, hunto cu Sra. Gina Lopez Gnecco di Bureau Minister Presidente tabata hopi envolvi den proceso pa produci mas informacion posibel pa conscientisa comunidad y ambos ta contento, cu a pesar cu ta den periodo di campaña, miles di hende a mira e pelicula, hopi a haci pregunta. Ambos ta kere cu e pelicula cu riba su mes ta un obra di arte di nivel halto, lo yuda hopi ciudadano reconoce pakico e ta bienestar, hasta di e propio persona cu ta risca su bida pa crusa lama y yega Aruba, pa no haya e oportunidad aki. Pasobra personanan asina facilmente por bira victima di abuso mas serio.