Relaciona cu publicacion di un articulo cu a sali publica den Miami Herald, na unda ta relata un caso cu SETAR a lanta contra varios persona y companianan cu ta bende celular, SETAR ta informa lo siguiente:
Despues di a tuma nota di e nomber di un di su empleadonan riba e lista di Panama Papers, SETAR a start un investigacion forensico intensivo cu a dura varios luna, (desde luna di mei 2016 te cu recien) for di cual a haya suficiente indicacion pa por a lanta un caso den corte na Merca na unda hopi di e suppliernan ta estableci. E periodo cu keda investiga a cubri 2005 te 2016. Esaki mester a tuma lugar den tur secrecia pa no stroba e investigacion. Unabes e peticion a keda entrega na corte di Merca tur e informacion ta publico.
E caso aki ta uno cu ta trata sospecho serio di fraude na nivel internacional cu companianan di exterior, cu e empleado aparentemente lo a conspira cu nan pa beneficio y comision financiero, fuera di conocemento di SETAR.
SETAR como compania responsabel a tuma tur e medidanan necesario pa por logra persegui esnan cu ta sospecha di a comete e actonan aki.
Den e articulo di Miami Herald ta menciona cu SETAR a ricibi celular re-furbished. SETAR ta confirma cu na 2014 a ricibi un cantidad limita di celular cu tabata re-furbished y cu appnan no apropia den nan y mesora a saca esakinan for di lote pa benta.
SETAR ta garantisa cu tur celular y productonan cu SETAR ta bende na cliente ta di halta calidad y cu na ningun momento lo permiti productonan cu no ta original.
SETAR ta den espera di e fecha den corte y por lo pronto, SETAR no por duna mas comentario pa no stroba e caso. Na su debido tempo SETAR lo informa di resultado di e caso.
