Awe na Museo Historico Aruba (Fort Zoutman) pa 7or di anochi ta bay tuma luga e competencia “Poeta di Patria” cu e presentacion di 10 participante, ademas di e ganado di e festival di Himno y Bandera Gismary Linarez, Shermine Maduro, Karena Maduro y Eduard van der Biezen.
E aña aki, pa 2024 un biaha mas Comision Celebracion Dianan Nacional (CCDN), Departamento di Cultura Aruba (DCA) hunto cu Comision Arte di Palabra y Fundacion Corector di Papiamento, ta organisa e prestigioso competencia pa nombra e di diesun Poeta di Patria, cual ta un iniciativa di Sr. Atan Lee den feliz memoria.
Nan a extende un invitacion na tur escritor, poeta y declamado di 18 aña bay ariba pa asina “nan busca den nan curason e inspiracion pa skirbi nan miho elogio y poema na idioma Papiamento, di nos dushi tera Aruba y su cultura.” E comision a sigura.
E competencia di Poeta di Patria ta bay tuma luga awe dia 7 di maart 2024 na Museo Historico Aruba (Fort Zoutman) pa 7or di anochi unda escritornan cu a inscribi ta bay presenta nan obra, si acaso e persona no por presenta su mesun obra, ta laga un otro persona present’e p’e.
Cada escritor a entrega un (1) obra, e poema ta na Papiamento y por tin entre 4 cu 9 strofa; cada strofa mester tin 4 frase y por rima. Awe nochi ta bay tin premio pa e Poeta di Patria y pa di dos y di tres luga.
Ganado di Poeta di Patria di aña 2023 tabata Rafael Garcia y e titulo di su poema tabata “Yiu di tera” e cual a ser composita pa: Rafael Garcia y Elsa Krosendijk.
