Aruba Airport Authority N.V. (AAA) ta raporta riba e prestacion di AUA Airport pa e lunanan April y Mei 2021; dos luna excepcional desde e inicio di e pandemia na Maart 2020.
Na April y Mei 2021, AUA Airport a procesa respectivamente 65,651 y 70,452 pasahero cu a sali for di Aruba. April a conoce 40% mas pasahero compara cu Maart y Mei a conoce 7% mas pasahero compara cu April. Durante e ultimo 2 lunanan AUA Airport a recupera 65% di e cantidad di pasahero cu a wordo procesa durante e mesun lunanan na 2019. Den e lunanan April y Mei 2021, 120,320 pasahero a biaha pa Merca, 7,131 a biaha pa Europa, 2,468 a biaha pa Antias Hulandes y 6,184 pasahero a biaha pa Latino America. E cantidad total di pasahero cu a sali for di Aruba durante April y Mei ta 69% mas hopi di loke a wordo premira pa e periodo aki.
Un averahe di load factor di pasaheronan cu ta sali for di Aruba (PLF) (cantidad di asiento ocupa na momento cu avion sali for di AUA Airport) pa e mercado Mericano di 71% (*) a wordo raporta durante e lunanan di April y Mei 2021, mientras cu e PLF averahe pa tur mercado tabata 68% durante e mesun temporada (en comparacion cu 2019 unda e PLF averahe di 85% a wordo alcansa).
(*Excluyendo “de-densification” di avion pa April – desde Mei aerolineanan no ta blokiando asiento mas abordo di avion)
Durante e ultimo 2 lunanan, AUA Airport a atende un averahe di 23 vuelo pa dia, bahando di 35 vuelo pa dia durante e mesun temporada na 2019. Durante e mesun periodo na 2020 AUA Airport a atende solamente 27 vuelo ora cu frontera tabata cera pa operacionnan comercial.
Basa riba e ultimo informacionnan ricibi, AUA Airport awo ta spera di recupera 60% di trafico pa 2021 en comparacion cu 2019 door di yega aproximadamente 760K pasahero cu lo sali for di Aruba. Esaki lo nifica un aumento di 77% compara cu 2020 unda cu a procesa un total di 430K pasahero cu a sali for di Aruba.
