(CuraçaoChronicle) – E comite cu a keda instala pa busca un compania nobo cu ta bay opera e facilidadnan petrolero na Corsou a selecta un cantidad di compania cu ta bay continua den e proceso di seleccion, di mas di 20 compania cu a mustra interes pa maneha y opera e facilidadnan petrolero.
E companianan aki actualmente ta ehecutando evaluacionnan usando e informacion cu nan a ricibi den un documento ‘teaser’ cu nan a obtene hunto cu e otro informacion relevante relaciona cu e facilidadnan. E companiana a ricibi acceso na e data room virtual di Refineria di Corsou (RdK), unda nan tabata por a obtene e informacion relevante regardando e facilidadnan petrolero.
Bishitanan na e refineria y e terminal na Bullenbaai tambe ta spera di tuma lugar den proximo simannan.
Managemente di e refineria y e comite instala pa busca un compania cu ta bay opera e facilidadnan tambe ta bay tene presentacionnan, entre otro, riba operacion y mantencion, recursonan humano y regulacionnan ambiental.
Fin di aña pasa, e comite a duna un solicitud pa un Expresion di Interes di potencial partnernan serio, kende ta interesa den maneho y operacion di e facilidadnan petrolero. E meta ta pa e partidonan interesa entrega un propuesta obligatorio no mas laat cu fin di februari 2022. Despues di e fecha aki, ta bay haci un seleccion final di e partido of partidonan cu ken ta bay continua negociacion.
RdK no por revela e nomber di e partidonan cu a mustra interes, ya cu RdK ta mara pa e acuerdo NDA (non-disclosure agreement) firma cu partidonan cu a indica nan interes den entrega un propuesta. Mientras e proceso ta keda evoluciona, RdK ta bay continua ofreciendo informacion relaciona cu e progreso y ta bay, na e momento adecua, revela e informacion di e partner of partnernan potencial scogi pa maneha y opera e facilidadnan petrolero na Corsou.
