Decenas di compania Mercano, incluyendo Apple y Disney, a expresa nan preocupacion pa e prohibicion di e aplicacion di chat Chines WeChat, The Wall Street Journal a skirbi. Segun e companianan, tin grave consecuencia pa nan posicion competitivo na China.
Presidente Mericano Donald Trump, a firma un decreto siman pasa cu ta prohibi transaccion entre companianan Mericano y compania mama di WeChat, Tencent, cuminsando 1 October. WeChat ta un app hopi popular y usa na China. Si transaccion cu WeChat lo wordo prohibi, hopi compania Mercano lo tin un gran desbentaha contra competidornan riba mercado Chines.
Companianan ainda no sa hopi di e interpretacion exacto di e prohibicion. Den e decreto di Trump ta prohibi “ cualkier transaccion cu WeChat.” Pero ningun detaye a keda revela. Companianan ta teme cu e prohibicion no lo laga nan pone aviso den e app. Asina companianan lo perde un plataforma importante pa promocion di productonan riba mercado Chines.
E prohibicion por tin mas consecuencia pa Apple. Pasobra e compania no mag di ofrece e app den nan ‘App Store’. Esey lo ta un obstaculo pa usuarionan Chines cu ta considera cumpra un iPhone. Companianan ta spera cu e alcance di e decreto lo keda reduci y bira mas claro den e proximo simannan.
