Minister di Salubridad Publico, Dangui Oduber a anuncia cu for di awe e proceso di registracion oficial di destaho publico riba cannabis medicinal ta cuminsa digitalmente via un website di e comision special encarga cu proceso aki.

Tur e companianan interesa pa participa den e destaho publico pa cultiva, elabora y produci cannabis medicinal ‘made in Aruba’ por participa te dia 16 di februari. Henter e proceso di destaho publico lo wordo supervisa pa un notario. Dia 22 di maart lo habri tur e proposicionnan di e companianan cu a participa. Despues lo sigui un proceso di evaluacion cu ta conclui dia 6 di april pa medio di e comision cu a keda institui.

Segun e mandatario Oduber kende a exhibi un road map di henter e proceso aki cu a cuminsa for di 2017, ora cu pa medio di e acuerdo di coalicion (MEP-POR-RED) bao e nomber Hunto pa Aruba a keda acorda e proposicion pa bin cu legalisacion di cannabis medicinal. Despues di 4 aña na 2021 nan lo instala e comision ‘Commissie Gunning Ontheffing Medicinale Cannabis cu lo tin e tarea di evalua e proposicionnan haci pa cultiva, elabora y produci cannabis medicinal via un destaho.

Dia 12 april lo bira e fecha cu lo tin programa pa otorga e prome cinco permiso of licencia di un total di 10 pa cultiva, elabora y produci cannabis medicinal. Tanten e mandatario a indica cu pa final di februari y cuminsamento di maart, e ley of cambio di ley cu lo permiti e actividad di cultiva cannabis na Aruba lo bay Parlamento. E proceso di e cambio di ley a cana su caminda regular y pronto e lo bay Parlamento pa wordo trata pa su eventual aprobacion.

Comision

E mandatario a bisa cu e comision aki cu ya caba a wordo aproba den conseho di minister, lo wordo integra pa un representante di ministerio di Turismo, Salud Publico y Deporte. Tambe di director di departamento di Asunto Economico. Inspector di Inspeccion di Remedi. Representante di minister encarga cu Infrastructura y Medio Ambiente. Representante di Ministerio di Husticia y representante di ministerio di Sector Primario. Ademas e comision lo tin representante di diferente partido politico. Encuanto si e representante di e partidonan ta esunnan cu ta forma e coalicion actual di gobierno of si lo tin di oposicion tambe. El a bisa cu e no sa con cada un a vota, pero e personanan cu ta forma parti di e comision aki, e ta convenci cu no ta personanan cu ta sostene e coalicion aki.

E comision aki lo tin como meta stipula e condicionnan pa tur esnan cu ta bay participa den e destaho aki. Despues un comision lo ta encarga pa selecta inicialmente cinco compania cu ta cumpli cabalmente cu tur e condicionnan pa por cultiva cannabis. Unabes cu e comision ta scoge e cinco compania, nan ta duna un conseho final na ministerio di salud.

Segun e mandatario tin tres (3) condicion basico: 1. E licencia no ta transferibel. E licencia of permiso ta strictamente pa e compania cu a haya e oportunidad di cultiva of procesa cannabis medicinal 2. Lo wordo duna un periodo determina pa e comision pa e companianan cuminsa cu e inversion di nan proyecto. E por ta 6, 9 y/of 12 luna. Si denter di e periodo ey e compania cu a haya e licencia no cumpli, e licencia ta wordo hala aden. 3. E producto final di loke ta wordo cultiva mester ta un producto medicinal y no recreacional.

Transparencia

Igualmente el a laga sa cu ainda e proceso no a start y ya caba tin rumornan of redashi cu tin personanan cercano di e mandatario cu tin interes den e actividad aki, y supuestamente nan lo wordo faborece cu e otorgamento di e permiso aki.

Minister Oduber a bisa cu nan lo encamina e proceso aki di un forma habri y transparente. “Mi no sa na unda e tipo di redo aki ta bin,” asina el a contesta. E mandatario a desmenti esaki categoricamente. El a bisa cu na niun momento nan tin interes den e proceso aki.

E ta argumenta cu si nan tabatin interes nan no lo institui un comision cu e ta considera ‘hopi imparcial.’ Un comision cu ta consisti di varios ministerio y departamento pa nan haci e proceso aki di un forma transparente. Na final nan mester bin cu un conseho na su ministerio riba cual ta e cinco companianan -cu a base di e evaluacion cu nan ta haci pa medio di e criterionan- cu ta bin na remarca pa e permiso of licencia.

“No sa cu na Aruba con e ta bay den un comunidad chikito. Tur hende ta conoce otro y tur hende ta famia di otro…, ” el a bisa. P’esey el a bisa cu nan a tuma e decision di realisa e proceso aki di un forma habri y transparente.

Actividad economico

Igualmente e companianan cu lo sali faborece despues di e destaho mester paga un fee determina pa e comision pa asina otorga e licencia. E fee a wordo reduci, ya cu inicialmente nan tabatin pensa pa pidi un suma basta halto. Sinembargo mirando cu tin mas isla den nos region envolvi pa añanan den e actividad aki nan kier a haci’e mas competitivo. E meta di gobierno ta pa duna e companianan local preferencia pa participa y gana e destaho aki

Na 2018 mundialmente e industria aki a genera 12.5 biyon dollar y e proyeccion ta -segun e mandatario- cu cannabis medicinal lo genera na aña 2024 un suma calcula na 63 biyon dollar. Di e bolo aki Aruba lo kier haya un pida tambe.

 

E mandatario a laga sa cu e proceso di e condicion exigi den e destaho lo ta uno hopi stricto y tambe cumpliendo cu tur ley y exigencia internacional. Pa logra esaki nan ta consulta expertonan tanto na Hulanda como na Merca. E ta haya cu e actividad aki ta uno prometedor economicamente.

Segun estudio realisa na Aruba cu a yega na e conclusion cu si 35 mil meter cuadra di nos teritorio ta wordo cultiva cu cannabis pa fin medicinal, e por genera 100 miyon florin, y 200 cupo nobo di trabao cu un salario averahe entre 3.600 florin pa 4 mil florin bruto. E ta spera cu na final e industria aki por produci entrada pa gobierno, cuponan di trabao y stimula nos economia.

Gobierno lo por ricibi na entrada alrededor di 12 miyon florin pa medio di diferente belasting, si gobierno ta duna un licencia. Pa e actividad aki gobierno tin tres area asigna: Un area lo ta pa cultivacion di cannabis na Aruba cu fin medicinal. E di dos area ta pa procesamento di e cannabis. E di tres ta e combinacion entre cultivacion y procesamento. Nan aspiracion ta cu pa e aña aki mes gobierno por cuminsa ricibi entrada di e actividad aki.

Gobierno ta spera cu e actividad aki por bira otro pilar pa diversifica nos economia. Segun investigacion cu a wordo haci si e 35 mil meter cuadra aki wordo cultiva exitosamente e lo contribui mas of menos 1% di nos GDP, segun minister Dangui Oduber.