Den e momento di crisis cu nos ta pasando aden, caminda e menasa di e coronavirus/Covid-19 ta exigi pa keda cas y percura pa distanciamento social, e uzo di internet ta mustra di ta mas esencial cu nunca. Mayoria di hende ta trahando y studiando for di nan cas haciendo uzo di internet.

Den otro pais, e gremio di e companianan di telecomunicacion mobil a percura pa tur ciudadano por tin acceso na e servicio aki y garantisa e suministro di nan servicio di Internet. Na Aruba tanto e compania estatal Setar como e compania priva Digicel a bin cu nan propio oferta pa nan clientenan, consciente riba importancia di uzo di Internet, vooral den e situacion cu nos ta pasando aden actualmente debi na e Covid-19. Setar a anuncia cu lo duna extra 8GB di LTE riba pakete di Postpaid y Hybrid te cu 30 di april. Mientras cu Digicel a opta pa ofrece plannan di data unlimited. Te hasta algun di nan a aumenta nan capacidad y seguramente nan a fortalece nan infrastructura pa evita problema den nan servicio.

Recomendacion

Sinembargo ta wordo recomenda pa nos por haci bon uzo di e servicio di internet, ya cu el a bira casi cu un instrumento vital aworaki.

Si nos ta us’e conscientemente nos por evita cu e sistema no collapse y evita cu e intercomunicacion lo por cay. Aunke Setar y Digicel como operadornan di e servicio aki niun momento a indica cu e suministro di nan servicio lo por core riesgo, si nan sistema ta wordo satura. Sinembargo ta logico cu henter comunidad mester colabora activamente pa henter nos poblacion for di nan cas of celnan por haci un uzo responsabel di e servicio aki.

Bon Dia Aruba ta trece un ehempel cu presidente di e gremio di compania di telecomunicacion mobil na Colombia, Samuel Hoyos a ilustra bisando: “E congestionamento di Internet ta mesun cos si tur hende ta bay di acuerdo pa saca nan auto den e mesun momento, locual ta ocasiona cu e careteranan ta wordo congestiona. Mesun cos ta pasa cu e red di internet.”

E compania cu ta brinda e servicio aki tin nan infrastructura, pero tambe nan capacidad cu ta conoce limitacion tambe. Considerando cu nos ta den un situacion di emergencia extraordinario cu ta produci un aumento considerabel den e trafico di e network y consumo di internet, esaki ta haci posibel cu lo por presenta problema. Ayera nos por a ripara cu e servicio aki a confronta algun problema y constantemente e tabata cay.

Esaki ta exigi di nos tur un uzo responsabel di internet. E prioridad ta pa haci uzo di Internet fundamentalmente como instrumento di trabou y educacion, prome cu bo ta haci uzo di internet como instrumento recreativo.

Otro sugerencia tin di haci cu ora bo ta download video haci’e den e oranan di menos uzo di internet. Kiermen den oranan laat di anochi of den oranan di madruga. Igualmente ora cu mas hende ta cera den cas, ta bon pa haci uzo consciente di internet y evita cu tur hende pareu ta haciendo uzo di e servicio aki, y menos download video of otro cosnan pisa.

Igualmente tene cuenta si bo realisa un conferencia virtual, si esaki no ta necesario, ta preferibel pa haci uzo di audio so. Si bo ta call un hende lo ta preferibel pa uza bo telefon di cas y no bo cel.

Nan ta recomendacionnan senciyo pero importante pa garantisa cu e servicio di Internet por funciona optimalmente sin afecta henter comunidad.