(NLTimes) – Tiki companianan Hulandes a prohibi TikTok for di telefon di nan empleadonan, NOS a mira esaki despues di a puntra decenas di dunador di empleo tocante e tema aki.

Preocupacionnan tocante con e plataforma y red social ta trata cu privacidad y si e gobierno Chino tin acceso na su data ta un problema cu ta mas tanto concerni e politiconan na Hulanda mirando cu e gobierno Hulandes ta considerando prohibi oficialnan di gobierno usa e aplicacion.

NOS a acerca decenas di dunador di empleo, incluyendo varios compania, 3 universidad tecnico, supervisor den e area di tecnologia, cuerpo policial y e 5 municipalidad mas grandi na Hulanda. Mas di 30 a responde, cu 2 tercer parti explicitamente bisando cu nan no ta prohibi TikTok. Solamente un di e dunador di empleo tabatin restriccion na vigor mientras cu varios otro no a duna comentario.

Philips, Gasunie, KPN, T-Mobile y Vebego no kier a duna comentario tocante nan medidanan di siguridad y si a tuma algun relaciona cu TikTok. Gasunie a bisa cu posiblemente nan lo uni na un prohibicion si e gobierno implementa esaki. Cuerpo policial y Dutch Data Protection Authority a bisa cu nan tin hopi restriccion riba kico por y no por haci cu celularnan di e compania. Esaki ta inclui pero no ta limita na TikTok.

ING, Eneco, Essent y Netherlands Authority for Consumers and Markets (ACM) no a prohibi TikTok pero generalmente ta pone nan mesun aplicacion riba celularnan den un area proteha pa motibonan di siguridad.

Machine di Chip ASML, cual a reporta robo di data pa un ex empleado na China luna pasa, no a responde tampoco. Fabricante di NXP tambe tin restriccion riba laptop pero no riba celularnan.

Vattenfall no ta permiti empleadonan haci uso di Tiktok. E municipalidad di Eindhoven no kier a yama esaki un prohibicion, pero a haci cu instala e aplicacion ta practicamente imposibel. Segun e municipalidad, TikTok “no por a provee suficiente certidumbre tocante reglanan di siguridad y privacidad.” Nan ta permiti si otro aplicacionnan di rednan social.

Preocupacionnan tocante TikTok ta centra riba e hecho cu un compania Chino ta doño di e aplicacion. Varios compania mundialmente ta preocupa cu e gobierno Chino por monitor kico e usuarionan ta haci riba e aplicacion.

TikTok semper a insisti cu e preocupacionnan aki no tin base y cu nunca nan lo provee data na e gobierno na China.