Companianan Hulandes facilmente ta beneficia di labor ilegal; Boet ta mucho abao, segun expertonan

(NLTimes) – Companianan dudoso sabiendo y intencionalmente ta trece trahadornan for di exterior na Hulanda ilegalmente, pasobra e boet contra esaki ta hopi mas abao cu e placa cu nan ta gana door di explota nan, segun Inspectorado di Labor a adverti.

E inspectorado a investiga 24 caso di trabao no declara. “Den mayoria di caso investiga, e beneficio pa e dunador di trabao ta asina grandi cu paga un boet pa un violacion estableci ta nifica menos gasto cu pago normal di e salario acorda den acuerdo laboral colectivo y e peso adicional riba e dunador di trabao.”

E investigadornan a calcula un beneficio averahe di gasto di 60 porciento. Den dies di e casonan, e beneficio a yega na mas di 20mil euro pa cada persona compara cu un persona cu ta traha segun acuerdonan di labor colectivo. E multa den e Ley di Empleo di Ciudadano Stranhero ta poni na un maximo di 8mil pa cada violacion desde 2005.

E inspectorado a destaca un incidente den cual un compania a gasta 6,240 euro riba salario pero lo a gasta 15,750 euro si lo mester a cumpli cu e proceduranan apropia. E inspectorado por a duna apenas un maximo di 8mil euro na multa, maske e compania a logra spaar 9,510 euro den costo cu e practica di contrato ilegal.

“Hasta si e suma standard di multa ta aumenta cu prosperidad y inflacion, otro gastonan social, manera presion añadi di mercado di vivienda, cuido di salud y educacion no ta inclui. E dunador di trabao cu ta contrata hende ilegalmente ta transferi e efectonan externo aki na sociedad,” e inspectorado a bisa. “Si tambe ta tene cuenta cu e efectonan aki, e suma standard di multa lo ta hopi mas halto.”

E organisacion a nota cu ta tuma menos cu un aña pa 90 porciento di compania cu ta contrata trahador ilegalmente spaar mas placa cu e balor di e multa. Casi 30 porciento di caso den estudio a mustra cu e periodo aki ta tres luna of hasta menos.

Ta dificil pa bisa con hopi trahador ta explota di e manera aki, pasobra empleo ilegal ta sucede “pa definicion den secreto,” un vocero pa inspectorado di labor a bisa Financiele Dagblad. “Basa riba e cifranan cu nos a logra haya door di investigacion, nos ta calcula esaki pa ta diesmiles.”