Pa prome biaha den su historia, Facebook ta enfrentando un boycott organisa di aviso. No ta di compania chikito – companianan grandi incluyendo Hershey, Honda y Verizon a stop di gasta. Varios compania a join e iniciativa despues di dia 1 di juli, incluyendo Sony, cu a bisa dia 2 di juli cu lo suspende tur aviso riba Facebook y Instagram te fin di luna.

Companianan di un variedad di industria, incluyendo Target, a sigui e accion. Target a bisa cu lo usa e pausa na juli ‘pa re-evalua nos plan pa resto di aña’, sugeriendo cu e tienda lo por extende su participacion den e boycott.

E meta di e campaña #StopHateforProfit ta pa presiona e gigante di rednan social pa cambia con ta maneha discurso di odio y desinformacion, incluyendo post hopi biaha incendiario di presidente Mericano, Donald Trump. E companianan ta priminti di stop di pone aviso riba Facebook y Instagram pa sikiera un luna.

Algun compania a hiba e boycott un stap mas leu, retirando aviso di casi tur plataforma di red social – no solamente Facebook – y e lista ey ta inclui Coca-Cola, Lego, Starbucks y Unilever. Microsoft a suspende su avisonan riba Facebook tambe, sikiera te augustus.

Pero ainda mester wak si e boycott aki lo tin un impacto – financiero of otro.

E coalicion di organisacionnan di derechonan civil, incluyendo Liga Anti-Difamacion, NAACP, Color of Change y Sleeping Giants a lansa e campaña dia 17 di juni. Facebook, nan a bisa, a permiti gruponan di odio prospera riba su plataforma, cu hopi hende ta join gruponan extremista pa motibo di e propio herment di recomendacion di e plataforma. Un estudio di ADL a haya cu 42% di usuarionan diariamente a experimenta acoso riba e plataforma.

E compania tin un lista largo di peticion, como cambio di politica pa preveni odio, y actualisacion di aligoritmonan, entre otro.

Carolyn Everson, vicepresidente di global marketing solutions na Facebook a bisa cu e compania ta respeta decision di e marcanan y ta keda ‘enfoca riba e trabou importante di elimina discurso di odio’.

240 compania a traves di cantidad di industria a uni e campaña #StopHateforProfit.