Diahuebs awor gobierno a yama reunion riba esaki

Segun minister di Infrastructura Otmar Oduber (POR) diahuebs awo lo tin un reunion cu tur departamentonan y ministernan concerni pa trata riba entre otro e ‘Beach Policy; 3 strikes you’re out’ unda lo tin cero tolerancia pa e tipo di actonan aki.

Cerca algun negoshinan di watersport nos a compronde sin embargo cu no tin control y falta claridad di e maneho.

Den comienso di siman a circula un video riba rednan social caminda por mira dos comerciante di negoshi di watersport den un confrontacion pisa cu otro. Nos a purba haya un reaccion for di nan pero no a logra cu ambos. Manera nos a compronde for di algun otro negoshinan den cercania, ultimamente tin basta problema caba den e mesun area ey. Mas tanto e problema ta concentra na Eagle Beach for di basta tempo caba caminda cu aparentemente negoshinan ta bringa cu otro pa motibonan di cosnan inhusto tumando luga cual ta keda acumula.
Nos a combersa cu algun negoshi di watersport cu ta bisa nos cu e instancianan concerni mester concentra riba esunnan cu ta keda causa problema y no generalisa tur e watersport nan. Algun ta conta Bon Dia cu e asunto di Beach Policy no ta mucho cla; hopi di nan no sa si esaki a wordo ehecuta ni tampoco ken ta esunnan cu ta controla of con esaki ta hinca den otro.

E maneho ta encera cu tur minister y departamento concerni ta riba mesun liña segun minister Oduner, algo cu aparentemente no a tuma luga e ultimo añanan. “Ami ta haya cu e sistema di watersport en general no ta un problema. E problema ta cu aki aya bo ta haya algun incidente y di berdad a bin cu un Beach Policy, pero mi ta haya esaki hopi generalisa”, un di e doñonan di un compania di watersport ta expresa, agregando cu e ta spera instancianan concentra na esunnan cu cada biaha ta keda bin dilanti cu problemanan riba beach.

Problemanan ta keda ripiti
Locual nos por a compronde for di varios negoshi den cercania ta cu problemanan ta keda escala ultimamente. Pero no ta solamente problemanan di negoshinan contra otro pero tambe djis hopi desafio y retonan cu e negoshinan di watersport ta enfrentando. Un di e cosnan cu a yega di trece dilanti ta pa no a permiti di trece tur e negoshinan aki banda di otro asina y cu ta solamente algun negoshi ta haya mas condicion/reglanan cu otronan. Nos a compronde cu por ehempel un negoshi ta permiti pa por tin mas cu 100 stoel riba beach y otronan no. Tambe algun luga no ta compronde pa kico nan mester paga extra den huur esaki si nan no ta bende ningun producto. Si kier pone algun tipo di musica riba beach, mester paga un cantidad grandi extra tambe por ehempel. No tin baño publico y hasta awor hotelnan aparentemente lo kier controla tur nan beachnan. Pues cu nan mes lo pone negoshi di watersport riba nan beach cual lo caba cu e negoshinan di famia.

“Dicon AHATA no ta haci un programa di certificacion, caminda cu tur esunnan cu ta cumpli cu rekisitonan di bon servicio di calidad ta haya un AHATA certified borchi dilanti nan negoshi pa distingui nan di esunnan por ehempel cu no ta cumpli”, ta un otro reaccion cu nos a haya for di comerciantenan di watersport. Di esunnan cu nos a combersa nan ta conta nos cu for di hopi tempo caba no tin claridad riba kico ta e maneho di Beach Policy y con e control ta hinca den otro.

Tin administracion riba advertencianan
Segun minister Oduber ta bisa, e maneho di Beach Policy ta hopi cla y cua instancia cu duna un advertencia, sea polis of cualkier otro, nan ta wordo conta riba otro y si yega na tres automaticamente e persona ta haya un sancion. Pero e no a toca riba e parti di control di esaki cual nos lo keda pendiente si lo bin dilanti den e reunion proximo y kico lo ta e solucionnan.
“Mi a reuni individual caba cu tur departamentonan concerni y tabata hopi cla cu tin un administracion di tur e advertencianan cu ta sali. Kiermen pa dia di mañan ora cuminsa kita algun permiso pa ningun hende no bisa cu ta algo personal. Loke a tuma luga comienso di siman ta inaceptabel y ta un daño enorme pa nos turismo. Pero mas cu tur ta mustra cu no tin respet pa autoridadnan local akinan na Aruba.”

E mandatario ta bisa cu e reunion di diahuebs awor ta pa refresca e mesun ruta di cero tolerancia pa e tipo di actividadnan aki cu ta tuma luga na nos beachnan. Den pasado e minister encarga cu infrastructura no a encarga pa DIP por a haya e autoridadnan pa haci e controlnan mas severo, cual ta inicia inmediatamente segun minister Oduber. E dos comerciantenan cu a bay viral den nan confrontacion den comienso di siman tambe awor lo haya un advertencia sin importa ken a inicia e confrontacion of no segun e mandatario a subraya.

Perde permiso
Minister Oduber ta enfatisa cu no ta importa cua instancianan duna advertencia, si yega na tres advertencia den un combinacion di e instancianan encarga cu control, lo nifica cu automaticamente e persona lo haya un sancion. E sancion lo por bira severo unda e persona lo por perde su permiso pa opera riba nos beachnan, cual lo wordo reenforsa diahuebs awor. “Esey nos ta bay ratifica un biaha mas den reunion di diahuebs. E metodo di cual DIP kier a cobra pa locual ta ponemento di stoel/parasol riba nos beachnan, no solamente di watersport pero tambe di hotel. A wordo perdi den corte pasobra e forma cobra den pasado no tabata corecto. Y nos lo trata esaki tambe pa sigura cu e maneho ta cumpli cu locual ta para den ley”, segun e minister. Manera menciona nos lo sigui e desaroyo aki y tambe combersa cu entre otro AHATA y otro instancianan concerni pa haya nan reaccion.