(NLTimes)—E tres companianan di energia mas grandi na Hulanda no tin un ganashi exorbitante pa via di e prijsnan halto di coriente, e Autoridad pa Consumido y Mercado Hulandes (ACM) a reporta despues cu e inspecta nan bukinan y strategia di compra. Aña pasa, ganashinan di Eneco, Essent y Vattenfall a cay entre 0 pa 5% compara cu aña anterior.
E prijsnan halto cu consumidornan tin cu paga a resulta pa gasto di compra halto pa gas y electricidad. Hopi biaha proveedornan ta cumpra gas y electricidad un of mas luna di antemano, p’esey prijsnan pa consumidornan ta halto mientras cu prijs di compra ta bahando. Proveedornan tambe mester paga mas pa sigura nan mes contra riesgo den e mercado di energia, segun ACM.
“Mi ta compronde completamente cu hopi hende ta considera e prijsnan di coriente ridiculo. Tin sospecho cu proveedornan di energia ta hayando ganashi mas halto pero esey no ta berdad,” segun president di ACM Martijn Snoep. “Costo halto di compra den e mercado ta causa e aumento di prijsnan. Si prijsnan riba e mercado keda cay, esaki lo cuminsa refleha den e prijsnan di proveedornan. Nos ta teniendo na cuenta cu esey.”
Segun ACM, prijsnan di consumidor ta cayendo caba. Desde 1 di maart, prijsnan di contractnan nobo ta 10 pa 20% mas abou cu un luna pasa. E cantidad di proveedornan cu ta ofrece contract vast tambe ta aumentando, y mas prijs di proveedor ta cayendo bou di e budget di gobierno pa energia.
