E dianan aki e companianan di chica pos a bira uno esencial pa nos comunidad. Desde cu gobierno a pidi pa tur hende percura keda cas mas tanto posibel pa evita e contagio di coronavirus/covid-19, y cantidad di hende a keda den cuarentena, mas gasto di awa y uzo di WC ta wordo haci, y e pos ta yena mas lihe.
Carlos Zambrano kende ta traha cu e compania di chica pos Monpox, a declara na Bon Dia Aruba cu nan trabou a bira mas pisa durante e dianan aki. E ta compronde cu esaki ta e mesun situacion cu e otro companianan di chica pos ta pasando aden. E situacion aki lo por bira mas pisa, awor cu gobierno a decreta ‘shelter in place’ for di diadomingo awor.
Tin clientenan cu normalmente ta yama pa e servicio cada dos of tres luna. Y aworaki despues cu a bin cu e campaña pa keda cas, den un periodo cortico di tempo, ya caba algun di nan a yama dos biaha pa nan servicio.
Nan ta percura di cumpli cu tur hende, ya cu si nan ta keda sin brinda e servicio, lo por presenta un problema di higiena cu hunto cu e Covid-19 lo por bira un problema mas grandi. Manera Bon Dia Aruba a reporta e siman aki, na Hulanda a detecta COVID-19 den awa residual na Amsterdam, Tilburg y Kaatsheuvel, cual ta ser procesa na e planta di waterverzuivering na Loon op Zand, unda e prome victima Hulandes di e virus aki a wordo identifica. E virus aki a ser haya cuatro dia despues cu e prome victima a test positivo pa e virus.
