beach policy control (1).jpg

Den cuadro di e Beach Policy nobo cu a drenta na vigor pa regula y bin cu control riba tur actividad entre otro acuatico cu ta tuma luga riba beach un peticion ta wordo haci na tur operadonan di compania acuatico pa nan tin cla nan permiso.

Director di departamento Maritimo, Sr. Carlyle De Coteau a declara na Bon Dia Aruba cu un gran cantidad di compania acuatico a renoba nan permiso.  El a bisa cu te fin di juli tur companianan mester tin nan permiso nobo den nan poder.  Ya cu pa 1 di augustus  e trabou di control a cuminsa si nan ta operando cu permiso nobo.

E introduccion y vigor di e policy aki no ta un sorpresa, ya cu nan a yega di informa esaki den medio di comunicacion y te hasta nan a yega di publica un comunicado recientemente rond di e topico aki. 

Permiso

Te cu un par di dianan pasa  mas cu un 50% a bin busca nan permiso na departamento Maritimo. Mirando cu e policy aki a drenta na vigor tres dia pasa nan ta premira cu esunnan pendiente lo bin busca nan permiso.

Sr. De Coteau a declara  na e matutino aki cu tur cos ta bay riba bon caminda. Logicamente tabatin un par di compania cu no a yena debidamente nan formulario ya cu nan a lubida di hinca algun actividad aden di nan solicitud di permiso nobo.  Pero nan a atende cu e asunto aki y nan ta cambiando esey y tur hende cu a bin busca nan permiso a firma cu nan a ricibie y cu nan ta di acuerdo cu  nan permiso.
 
Tambe el a laga sa cu esun cu no a firma ta pasobra cu nan no tabata di acuerdo  pero despues di papia nan ta drech’e y despues nan a firma cu nan a hay’e. Banda di esey departamento Maritimo a entrega e maneho nobo na e  companianan aki cu ta opera actividad acuatico riba nos beach.

E maneho nobo aki ta bin for di Ministerio di Transporte Publico y Ministerio di Infrastructura caminda den e maneho aki ta stipula cu e compania cu no ta cumpli debidamente cu e Beach Policy ta bay haya.  Segun Sr. De Coteau basicamente no tin nada nobo ya cu e tipo di sancion semper ta para den ley. Pero unico cos cu nan a haci ta hancr’e den e permiso cu nan ta otorga.  
El a pone como ehempel cu si un compania ta contrata hende pa maneha nan botonan cu turista y e persona ey no tin un vaarbewijs valido e por ta un motibo cu nan por perde nan permiso.  
    
Otro ehempel ta cu si e compania ta operando riba beach y nan no a cumpli cu exigencianan di departamento di Infrastructura y Planificacion (DIP), nan tin chens grandi cu nan por perde nan sitio di operacion. DIP tin su mesun regla y maneho con e companianan aki mester comporta nan mes riba beach, Sr. De Coteau a declara.  

Responsabilidad

Un punto importante ta cu si DIP ta “trek in” nan permiso di e sitio unda nan mester opera specificamente riba beach. Si esaki ta sosode, automaticamente DIP ta informa departamento Maritimo ya cu si nan no tin permiso pa opera den un sitio riba beach, esaki kiermen cu e compania aki tampoco por opera un compania acuatico . “Esaki kiermen cu tambe nos por trek in e permiso di operacion di actividad acuatico”, segun Sr. De Coteau.

El a bisa cu pa medio di e maneho aki nan ta pone bek e responsabilidad den man di e doño di e permiso.  Ya cu e mester percura pa su compania pa su compania por bay bon, y cu su hendenan den nan servicio  por comporta nan mes bon riba beach. 

Di e forma aki –segun Sr. De Coteau- nan por tin miho control pa medio di e Beach Policy. El a bisa cu antes tabata conoci cu nan tabata operando “sin ningun miedo di ningun consecuencia.  Anto esey aworaki tin consecuencia si nan ta faya”, asina director di departamento Maritimo a bisa.