Dialuna minister di Energia, sr. Mike de Meza a duna un breve panorama relaciona cu e exploracion di recurso energetico cu e compania Repsol hunto cu dos compania mas ta realisando den nos lama teritorial.
Despues cu nan a haci investigacion 2D y 3D sismografico, awor nan ta bay cuminsa interpreta e datonan. Pero tambe ta bin un parti hopi crucial riba e futuro di e exploracion aki cu tin di haber cu e discusion riba nivel di e board di e tres compania Repsol, Total di Francia y British Gas di Inglatera cu a wordo adkiri dor di Shell.
Minister de Meza a bisa cu e tres companianan aki a informa gobierno di Aruba cu nan lo por duna un informacion definitivo na fin di november awor. Pero nan lo kier haci uzo di algun luna mas pa nan bin cla cu tur e trabounan. E mandatario a bisa cu gobierno ta premira cu pa fin di e prome kwartaal di otro aña, nan lo haya e decision di e compania envolvi den e exploracion aki.
E decision aki tin di haber si nan lo sigui cu e siguiente fase riba un perforacion di prueba. “Esaki lo ta sumamente interesante. Tur cos cu a wordo haci na e momento aki ta mustra hopi positivo”, el a bisa.
Recientemente sr. de Meza tabata na Madrid, unda el a bishita e ehecutivonan di Repsol, y e mandatario Arubiano a haya un presentacion fei nan. E impresion cu minister de Meza a haya ta cu e compania aki tambe ta “sumamente contento di mira kico ta e datonan cu nan a haya den awa teritorial di Aruba”.
