Na nivel di reino Hulandes lo wordo evalua si lo introduci un tipo di visa cu lo por frena un poco e fluho di Venezolanonan cu no ta bin Aruba pa haci turismo. Sinembargo den e pais bisiña di Venezuela ta wordo informa cu e compania Naviera Paraguana lo cuminsa opera un ferry cu lo cubri e ruta di Falcon-Aruba-Corsou.
Agencia Venezolano di Noticia (AVN) a divulga un noticia cu “Correo del Orinoco” a bin cun’e riba su website caminda cu nan ta buscando e manera pa diversifica economia di Venezuela. Na Falcon nan ta mira cu activacion di un ferry cu lo permiti e transporte di pasaheronan y carga pa Aruba y Corsou. E proyecto aki ta forma parti di e agenda economico Bolivariano riba tereno di turismo.
Nan ta cita cu vice-presidente di Naviera Paraguana, Romny Merceoleo a declara cu proximo luna nan lo tin pensa di activa nan servicio di ferry fei puerto di Guaranao na Punto Fijo. E ta un di e seis puertonan cu nan tin disponibel pa cuminsa nan operacionnan.
E ferry lo tin capacidad pa 600 pasahero y e lo nabega 28 nudo (32km pa ora) haciendo recorido di dos ora. E ta un ferry fabrica na Grecia cu capacidad pa 160 auto chikito y 20 container cu productonan seco y den freezer. Nan a bisa cu e transporte aki lo facilita e exportacion di producto pa Aruba fei e puerto di Guaranao. E ehecutivo di e compania aki a laga sa cu na nivel gubernamental, Gobernacion di Peninsula di Paraguana a cuminsa acelera tur procedura y documentonan dilanti Ministerio di Poder Popular pa Transporte Acuatico y Aereo pa e ferry cuminsa su operacion pronto.
