Awe mainta corte a suspende tratamento di caso MetaCorp Chain Theatres contra gobierno te diamars otro siman. E decision aki a bin pasobra cu Aruba Birdlife Conservation (un di e partidonan envolvi) no a haya suficiente tempo pa revisa e stukken y prepara pa e caso.

Atrobe e fundacion Aruba Birdlife Conservation ta hinca mey mey di un bataya pa naturalesa. Den e caso aki e compania MetaCorp y E. de Veer di Chain Theatres NV ta hiba pais Aruba corte pa motibo cu aparentemente lo tin indicacion cu minister di infrastructura of su departamento a tranca otorgamento di un tereno otorga previamente. Aruba Birdlife Conservation a haci un peticion na corte pa uni su mes cu gobierno pa e caso aki mirando cu den nan opinion no por construi riba e tereno aki.

Cinema y mall nobo
E tereno (wetland) den cuestion ta situa patras di South Beach/Hooters unda cu tin un proyecto di Mall/Cinema den planificacion pa construccion. Den corte a bini pa dilanti cu gobierno a duna e compania e opcion pa haya e tereno na januari 2017. Esaki ta un proyecto cu aparentemente lo keda cla despues di 52 siman di construccion cu lo consisti tambe di inversion grandi di un asina yama ‘sistema IMAX’. E compania no kier perde e contract exclusivo aki cu IMAX (cual aparentemente lo brinda exclusividad na Aruba den ramo di Cinema) y sufri consecuencia financiero pa via di tardansa cu procedura di otorga tereno como erfpacht. Abogado representando gobierno, Celina Wever,  a enfatisa cu e compania mester tin pasenshi riba otorgamento di derecho di erfpacht anto a pidi hues pa rechasa demanda aki anto laga e proceso cana su caminda.  Rapport di DOW mes ta pidi pa haci mas investigacion riba e tereno prome cu construi.


Aruba Birdlife Conservation
Segun  nos a compronde for di Greg Peterson di Aruba Birdlife Conservation, nan abogado a pidi e documentonan (stukken) for di ambos partido (MetaCorp Chain Theatres & Land Aruba) anto ambos a nenga di duna esaki.  Sr. Peterson ta comenta cu e no sa dicon pero e ta pensa cu kisas nan no a worry of no tabata kier pa abogado di ABC bin participa den e caso. Pero awe nan mester a accepta esaki pasobra no tabata tin ningun motibo pa no comparti e documentonan aki.  E abogado pues lo haya e documentonan pa haya un oportunidad di studia nan pa sigui cu e caso diamars proximo 8:30 di mainta.

Area protegi
Segun sr.Peterson ta conta nos, e ta haya cu tin algun cos cu ta poco preocupante den e caso aki. Prome Minister Mike Eman a publicamente anuncia aña pasa cu lo asigna 16 area di naturalesa cu lo wordo protegi, y segun sr. Peterson esaki ta un di e areanan aki. Peterson: “E cos aki a wordo ripiti asina hopi biaha y toch den januari di e aña aki un hende a bay y duna un ‘optie’ pa haya e tereno aki. Segun e R.O.P. esaki ta un area cu no ta designa pa e tipo di cos aki.”

E ta sigui bisa nos tambe cu DOW a conseha contra e proyecto aki. E abogado di ABC ta enfatisa cu e tereno aki ta consisti di puro lodo y ta bira un desaster ora cu awasero ta cay, cual ta hopi cuestionabel segun sr. Peterson. Directie Natuur en Milieu no a haya un oportunidad pa skirbi un rapport riba esaki ainda tampoco cual ta hopi importante pa nan haci, segun sr. Peterson ta splica nos. Sr. Peterson ta comenta: “Nan no a envolvi e departamento aki cu semper mester ta envolvi den e tipo di cosnan asina.  Esaki ta un area cu Princes Beatrix mes tambe a bin apoya pa proteccion unda cu tin 168 specie di parha registra.”