Un compania local ta bay bringa un otro compania den corte cu pa hopi aña ta operando ilegal. Pero remarcabel den caso aki ta, cu e compania local a ranca e horeanan di gobierno hopi biaha, como cu gobierno ta duna e compania ‘ilegal’ aki hopi trabao.

E compania Island’s Best Windows & Doors ta bisa cu nan no ta e unico compania local cu ta keha di e situacion aki. Den e industria di bentana y portanan mas productonan local tin problema cu gobierno den su destahonan a duna trabou na e compania acusa. E negoshi local a haci diferente intento pa mustra gobierno riba e asunto aki. Nan a manda un carta aña pasa pa minister Mike de Meza, e tempo ey ainda minister encarga cu Asuntonan Economico. Den e carta aki nan ta menciona tambe un bishita na prome minister Mike Eman, unda e compania a expresa e problemanan den nan industria, entre otro esun di e compania operando ‘ilegal’.

Segun e compania local e prome minister a priminti di investiga e asunto y tambe cu gobierno lo tene cuenta cu den destahonan di trabou, lo busca na prome instante companianan local pa haci e trabou. Sinembargo despues e compania local a ripara cu DOW hasta a cualifica e compania ‘ilegal’ como un ‘norma’ pa e trabou y servicio.

Acusacion
E problema cu nan tin cu e compania ‘ilegal’ ta cu e ta opera desde 2010, pero tabata operando riba nos isla sin registracion den Camara di Comercio. Bon Dia Aruba no por menciona e nomber di e compania ainda, pa motibo cu no a logra di haya nan banda. Sinembargo nos por mira cu e compania ta registra desde october aña pasa. Un otro punto ta cu e compania ‘ilegal’ ta importa su portanan y bentananan for di e pais Polonia. Pero e no ta keda te eynan. Ora un container ta yega pa un proyecto, di biaha trahadonan for di e pais aki tambe ta yega hunto cu ne. Asina e trahadonan aki sin permiso ta haci e trabou di instalacion.

Awor e compania local a fada cu e situacion y a dicidi di bay corte, pasobra nan ta haya cu e compania ‘ilegal’ a haci daño financiero na nan y otro companianan na Aruba. Desde un par di aña Aruba conoce e ley ketenaansprakelijkheid. Esey ta nifica cu e compania principal cu ta haya e trabou/proyecto y uza subcontratistanan pa haci partinan di trabou, ta para responsabel tambe pa e otro companianan aki. Pues si e subcontratista no ta paga su impuesto of tin trahadonan ilegal, e compania principal tambe por confronta problema cu esaki.