ORANJESTAD – Ayera mainta a keda firma un acuerdo di entendimento (MoU) pa instalacion di un radar pa pais Aruba. Den e acto aki tabata presente vice presidente di parlamento Allan Howell, Alto Comisario di Polis Andrew Hoo, Procurador General Alexander van Dam, entre otronan. E radar ta di e compania Seahawk Navigation AS di Noruega cu nan mes ta fabrica radar.
Minister di husticia, Andin Bikker a declara cu nan a scoge e compania aki ya cu nan radar di un bon calidad di detencion. Tambe nan sistema di radar por wordo implementa hopi lihe. Tambe e sistema di radar por duna acceso na otro departamento, manera duana, wardacosta, Guarda Nos Costa pa nan por tin bista tambe riba nos frontera maritimo.
Otro facultad di e radar aki ta cu e por detecta cu tempo e presencia di oil spill, si e ta biniendo direccion di nos costa. P’esey den e acto di firma di e MoU aki a participa minister di medio ambiente, Otmar Oduber y tambe prome mandatario, Evelyn Wever-Croes.
E plan aki ta hinca den e presupuesto 2019, esta e reintroduccion di e sistema di radar pa loke ta trata optimalisa e siguridad di nos frontera. Den cuadro di e retonan financiero, e balor di e radar aki ta pas den e budget asigna.
E ta un radar na servicio di Cuerpo Policial. Nan a yega di instala un comision caminda a base di nan recomendacion, esaki a wordo trata den conseho di minister pa asina por a cay e decision final.
Tambe el a anuncia cu den transcurso di otro siman lo conclui e proyecto di helicopter. Pero tambe e ta spera cu pa luna di augustus venidero lo pone e prome piedra di e proyecto di KIA nobo.
