Pa e exploitacion di un servicio di ferry entre e peninsula di Paraguana y e islanan ABC e compania di nabegacion Venezolano Naviera Paraguana ta sali for di un Memorandum of Understanding (MoU) entre Reino y Venezuela. Esaki ta para den e buki di informacion cu aña pasa november a duna e stakeholdernan Arubano.
Esaki nos partner den noticia, Ret Karibense ta divulga. Den e buki tin para cu Naviera Paraguana – banda di e Plan pa Patria cu gobierno Venezolano a formula – ta mira e MoU pa cooperacion entre e Republica Bolivariana Venezuela y Reino Hulandes como ‘fundeshi’ di su exploitacion di empresa.
Na juni 2013 e minister Hulandes di Asuntonan Exterior Frans Timmermans, su colega Venezolano Elias Jaua Milano, embahador Hulandes Johannes van Vloten Diessevelt, prome minister Daniel Hodge di Corsou y e prome minister Arubano Mike Eman a firma e MoU.
Aki den tin para cu Reino y e regimen Venezolano lo bay coopera den e area di entre otro economia, defensa, medio ambiente, telecomunicacion, transport y ciencia.
A palabra pa lanta grupo di trabou pa tur aña reuni riba nivel administrativo. Cada dos aña tur dos pais lo a bin hunto riba nivel di minister pa delibera. Na februari di 2014 e corant di estado Venezolano a anuncia cu e MoU tabata na vigor den e pais.
Gobierno despues a nenga
Na september di aña pasa Naviera Paraguana a presenta e barco Paraguana den waf di Guaranao cu e anuncio cu na november e servicio di ferry lo ta operacional. Na Aruba auorioridadnan a declara cu e servicionan di gobierno no tabata cla pa ricibi pasahero, aunke cu e autoridad di waf APA si a priminti un luga pa e ferry mara.
Sr. Eman y e otro ministernan a hasta nenga di ta na haltura di e plannan di e ferry Na october atrobe un autoridad Venezolano a anuncia su yegada durante e reapertura di e refineria na San Nicolas.
