Durante un conferencia di prensa di sr. Jan de Ruijter y Michael Williams diamars , den cual nan a trece dilanti cierto casonan di corupcion cu presuntamente tin vinculo cu e firma di abogado Croes-Wever-Ruiz, un señora cu ta traha na oficina di abogado aki a acerca sr. De Ruijter den pleno conferencia di prensa pa informa di un presunto debe cu Ruijter tin cu un compania di financiamento local.
Mirando e situacion aki, e compania conoci pa comunidad a publica un comunicado di prensa, den e cual nan a aclaria cu nan no tin ningun relacion cu e señora cu a papia cu sr. De Ruijter, ni un trato comercial of relacion cu e oficina di abogado aki.
“E mencion di nos empresa no tabata autorisa”, e compania a referi. Ademas a enfatisa cu nan no por confirma of nenga si algun persona tin of tabatin un cuenta cu nan, pa motibo cu nan ta ‘hopi cauteloso’ cu nan relacion comercial cu nan cliente.
Di mesun manera, un biaha mas nan a señala cu e compania estrictamente ta protege e privacidad di nan cliente y semper nan ta cumpli cu regla estricto di regulacion di privacidad pa Banco Central di Aruba.
Den e conferencia di prensa aki, tambe a trece dilanti acusacionnan cu tin di haci cu un ex-minister cu presuntamente ta envolvi den casonan di corupcion, y ta p’esey cu De Ruijter y Williams a yama pa e conferencia aki, pa duna di conoce esaki pa comunidad di Aruba.
