Algun dia atras a cuminsa e movecion di tera pa inicia e construccion di St Regis Hotel & Resorts na Palm Beach, loke a causa un conmocion grandi den comunidad pa via di rumornan cu e beach dilanti di e tereno no lo keda publico mas.

Pedro Vera, director y manager di e proyecto di St Regis Hotel Aruba hunto cu Mito Martis, consultant di e proyecto di Grupo Caledonia Magement Company, a ofrece un conferencia di prensa ayera mainta pa trece dilanti diferente punto tocante e construccion di e hotel, como tambe aclaria cierto rumornan, cu segun nan mes a bisa, ‘no ta corecto’.

Martis a trece dilanti cu nan kier informa comunidad con e proyecto ta pa sigura cu e compania constructor ta respeta e reglanan cu gobierno y departamentonan ta pone pa traha hunto cu tur e permisonan necesario pa e proyecto por cuminsa.

Nan a splica cu e marca St Regis ta un marca propiedad de Hotel Marriott. Pa desaroyo di e hotel a tuma na cuenta diferente elemento local di e isla, por ehempel mina, lama, vegetacion, refineria y otro, pa e proyecto tin un espiritu na momento cu cuminsa cu e desaroyo interior y exterior di e hotel.

Di loke ta trata inversion, Vera a duna di conoce cu e inversion total di ‘construccion so’ di hotel tin un balor di 230 miyon florin. E proyecto lo mester keda cla pa luna di september di aña 2022.

Vera tambe a declara cu nan no tin permiso pa trece stranheronan pa traha den area di construccion, sino solamente hende local ta esunnan cu lo bay traha den e parti ey. Tambe pa trahadonan den general na momento cu henter e proyecto keda cla pa publico.

“No tin ningun convenio di parti di e propietarionan di hotel pa duna permiso special pa e parti di trahadonan di hotel, nos mes kier cu e trahadonan lo ta 100% local”, Vera a comenta.

E hotel lo ta ubica na banda di hotel Riu y di otro banda cu un parke publico cu nan a sigura ‘cu lo keda como un parke publico’.

Den e compromiso cu a cera cu gobierno di Aruba, Vera a manifesta cu tin e renobacion di e parke, loke ta nifica e construccion di un parke nobo cu vegetacion. Den esey ta regarda e mantencion, e construccion di un warda nobo di Polis, tambe mantencion di e banda di lama na unda e muchanan ta bay siña landamento, integra esey den un forma ‘paisajistico’ y cu mester keda cla den mesun tempo cu e hotel.

Asina mes, Vera a anuncia cu esey ta forma parti di e Master Plan cu nan tin cu aproba caba pa DOW, cu tambe ta inclui e construccion di un veld di basketball, ampliacion di e parkinglot, construccion di palapa, camineria, algun acceso pa e area y entrada di busnan pa e muchanan cu ta siña landamento.

Vera, a comenta cu St Regis ta un marca cu a ser desaroya den añanan 1800 y idea ta pa genera un hotel boutique 5 strea di luho cu lo tin 200 camber, 22 residencia, spa, restaurantnan, casino, poolnan, entre otro. Tocante e 22 residencia, Vera a informa cu ta pa e turistanan por huur pa un tempo limita.

E hotel lo tin un haltura di 42 meter cu a ser acorda cu gobierno pa motibo cu den proyecto original tabatin mas haltura y mas capacidad pa cambernan.

Tambe, a keda conoci den diferente medionan local cu e proyecto di construccion aki a cuminsa desde 14 aña pasa, tocante esaki Vera a contesta nan a firma un acuerdo cu Gobierno poco menos di un aña pasa y nan a haya permisonan di construccion tres luna pasa pa motibo cu e tereno tabata pertenece pa otro compania primeramente.

“Pa desaroya un diseño nos a tarda un aña, nos como propietarionan nobo di e compania tin poco tempo cu e desaroyo aki” Vera a señala.

Pa finalisa, Vera a splica cu na e momentonan cu nan lo termina e toren principal di acero, nan lo mester cuminsa tuma medidanan di siguridad segun DIP y DOW ta regarda pa no stroba e personanan den e ora cu kier disfruta di lama.