Diabierna ultimo, Prome Minister Evelyn Wever-Croes tabata presente na e ceremonia di firmamento di e contrato entre Compania Arubano di Petroleo (CAP) cu Andicuri Oil & Gas Exploration VBA (AOGX), cu ta un subsidiario local di Armstrong International LLC (“AI”), pa e exploracion, desaroyo y produccion di hidrocarburos den e area maritimo di Aruba.

Den un comunicado di prensa, prome Minister a splica cu e compania Armstrong tin un historia excepcional den exploracion y a yega di descubri varios campo di petroleo enorme den pasado. E compania ya caba a haci hopi investigacion y a yega na e conclusion cu tin hopi cos di petroleo y gas rond di Aruba cu nan ta haya hopi interesante. Tambe, riba nan propio cuenta, a haci tur e inversion necesario pa haya tur e datos pa haci investigacion. Pa e siguiente 18 lunanan nan ta bay busca mas datos, mas informacion, y cuminsa bora pa wak si nan por haya algo den e awanan teritorial di Aruba. Si nan logra haya, nan lo bay over na explora y saca e gas y petroleo, pa asina nan cuminsa proces’e y bende, cual lo ta un entrada hopi grandi pa pais Aruba.

Prome Minister a indica cu e acuerdo aki ta uno hopi importante, pasobra e ta diversifica e economia, mirando cu Aruba no por keda depende solamente riba turismo. Gobierno ta haciendo nan maximo esfuerso pa Aruba ta mas fuerte y resiliente, y un stap importante ta pa diversifica e economia, y den e area di energia lo por logra esaki.

Segun un comunicado di gobierno, e contrato aki no tin niun gasto pa Gobierno, pero e compania Andicuri si ta bay paga belasting, y un suma anual di 375 mil dollar na e compania Arubano di petroleo, cu ta un compania estatal pa asina nan por haci exploracion den e 18 lunanan nos dilanti.

“Mi mester bisa cu nos ta cautelosamente optimista mirando cu anteriormente ya a purba caba di busca gas y petroleo, pero no a haya nada. Aruba no tin nada di perde cu purba un biaha mas, mirando cu e compania aki ta pensa cu si tin, y lo busca esaki riba nan propio gastonan. Si logra haya gas y petroleo, Aruba lo tin un pilar economico nobo cu lo crea mas cupo di empleo, specialmente pa nos hobennan cu ta studiando den e ramo aki. Tambe e lo ta un entrada pa gobierno, haciendo Aruba hopi mas stabiel financieramente y economicamente

Mi kier gradici Minister Glenbert Croes, pa su vision, determinacion y empeño, compania Arubano di Petroleo, y na señor Armstrong di Armstrong International LLC (“AI”), pa kere den Aruba” Prome Minister a expresa.

Consideracion ambiental

Algo cu no a keda menciona den e comunicado di prensa ta e potencial impacto ambiental di exploracion di gas den awa teritorial. Den añanan recien, por nota entre comunidad local un interes cada bes mas grandi pa proteccion di medio ambiente y naturalesa, cu ta impulsando cambio den e manera cu Aruba ta desaroya su teritorio.

A pesar di e potencial beneficio economico cu por bin cu exploracion di gas – si haya gas na final, e riesgo den cual ta pone medio ambiente ta enorme. Segun WWF, “extraccion di depositonan di gas y azeta por resulta den daño duradero pa medio ambiente. Specificamente, exploracion y desaroyo di gas ta causa interupcion di rutanan migratorio, degradacion di habitatnan animal importante, y derame di azeta – cu por ta devastador pa e animal y humanonan cu ta depende riba e ecosistemanan aki.

Entre e consecuencianan negativo cu exploracion di gas por causa, WWF ta resalta contaminacion, zonido den lama, degradacion y destruccion di habitat, y interferencia cu formanan di bida di subsistencia.

Operacionnan di gas ta libera tonnan di contaminante dañino den aire y ta basha kimico peligroso den lama, degradando e awa y are limpi riba cual bestia y hende ta depende pa sobrevivi. Bayena y otro animal marino ta usa zonido pa nabega, haya pareha y cuminda den e awanan hopi biaha scur di ocean. Zonido sismico, manera e air gun usa pa companianan di gas pa explora offshore, por laga e especienan aki sordo. Zonido excesivo den ocean for di boramento y exploracion di gas por causa lesion, confusion y hasta morto di animalnan.

Ademas, e caminda, tuberia y otro facilidadnan construi pa e companianan pa sostene infrastructura por degrada y destrui habitat importante y interferi cu movemento di animalnan migratorio.