Como un señal di nan desaroyo, Gangnan cibernetico awo tin sistema arbitrario pa resolve problemanan di pago

(AP) – Gang criminal cibernetico ta birando cada biaha mas avansa den hacking, pero tambe mas profesional, cu un sistema nobo arbitrario pa asina resolve cualkier problema tocante pago entre nan mes, segun un reportahe nobo haci pa Merca, Australia y Reino Uni cu ta pinta un imagen scur tocante e moda di secuestro di dato.

Gangnan di ‘ransomware’, cual ta secuestro di datonan, a causa problemanan grandi aña pasa cu varios atake di perfil halto den e compania mas grandi di carni, e compania di gasolin mas grandi na Merca y varios otro victima. Gobiernonan a compromete pa yega na e criminalnan cibernetico aki, kendenan ta opera mas tanto den y rond di Rusia, pero nan tin tiki material pa demostra cu tin algun progreso pa cu e meta aki.

E reportahe nobo tocante e moda di secuestro di datonan publica den aña 2021 ta trece dilanti e madures y specialisacion cu ta keda crece den e mercado di ‘ransomware’, cu operadornan independiente yenando un mercado lucrativo. Specialistanan awo ta bin den un variacion di hacker cu por drenta e rednan of cu por desaroya ‘ransomware’ na e operadornan no tecnico cu ta negocia e pagonan cu e victima. Reino Uni su National Cyber Security Centre a bisa cu nan a mira gangnan di ‘ransomware’ ofrece un centro di ayudo di 24 ora na victimanan pa dialoga tocante e pago y pa reestablece nan informacion.

Te hasta tin un luga pa e mediadornan cu ta yuda resolve problemanan di pago entre e varios criminalnan den e diferente gangnan aki segun e reportahe.

“E mercado criminal ta increiblemente eficiente y ta desaroyando constantemente,” John Hultquist, vice presidente di analisis di inteligencia na agencia di siguridad cibernetico Mandiant. “E hecho cu nan por opera di e manera aki, ta evidencia cu nos a fracasa di por pone man riba e asunto aki.”

E reportahe tambe ta describi e habilidadnan tecnico di e gangnan cibernetico aki, cual tin e habilidad di yega na infrastructura cibernetico, hopi biaha mira como un alternativa mas sigur pa warda datonan localmente, y e habilidad di desaroya codigo cu por para procesonan industrial. Autoridadnan di Merca a bisa cu nan a yega mi mira atakenan ‘randsomeware’ involucrando 14 di 16 sectornan critico di infrastructura, incluyendo e base di defensa industrial y e sectornan di informacion tecnologico.

“Ora cu hackernan stranhero operando for di un sitio sigur den un pais cu relacionnan complica ta pone den riesgo infrastructura critico, e ta bira un problema di siguridad nacional,” director di siguridad cibernetico na National Security Agency Rob Joyce a bisa den un declaracion, agregando cu un solucion pa e atakenan aki ta “un enfoke significante” di NSA.

E reportahe aki a ser pidi riba diaranson pa FBI, NSA y Cybersecurity and Infrastructure Security Agency na Merca, conhuntamente cu Reino Uni su National Cyber Security Centre y australian Cyber Security Centre.