Minister di Finansa, sr. Angel Bermudez tambe a tuma nota di e caso di Panama Papers. Fei di aña a lek den cierto seno di periodistanan un avalancha di documento cu supuestamente ta origina di Panama.
E mandatario no a referi directamente na e compania cu ta den wowo di horcan, esta Mossack Foseca (MF), sino cu el a indica cu Panama ta un pais conoci internacionalmente como centro financiero. Sinembargo e ta sigui e desaroyo aki cu tur atencion pa wak si Aruba tin algo di haber.
E ta kere cu nos “no mester dramatisa henter e desaroyo aki”. Den un sentido e ta bisa cu semper a lo menos den e ultimo 100 aña centronan financiero ta existi. Ademas e no ta kere cu ta necesario pa evita e uzo di structura huridico internacional cu entidad legal manera esun na Panama y otro sitionan.
E ta kere cu e problema ta sinta riba e motibo di e uzo di e tipo di empresa experto riba structura huridico di offshore. Minister Bermudez ta haya cu ora cu un fluho di capital tin un grado halto di privacidad y discrecion, esaki ta ocasiona cu cierto momento eynan ta registra un acumulacion di e tipo di capital ey. Esaki ta e factor cu ta contribui pa forma un centro financiero internacional manera aworaki Panama.
“Bo no por descarta nan completo. E ta keda un parti di nos sistema financiero internacional. Pero loke bo tin cu combati ta e caracter y aspecto ilegal y te hasta e aspecto criminal cu tin biaha e structura aki ta wordo uza”, e mandatario a declara na Bon Dia Aruba.
E ta haya cu eynan gobierno tin un tarea di supervisa, investiga y coregi. E gobierno mester percura cu nan hurisdiccion teritorial no ta wordo abusa pa actividad ilegal of criminal. “Como Aruba nos mester zorg pa nos reputacion keda limpi y positivo”, el a bisa.
