Como 800 cambio di ley ta keda wanta; Un biaha mas ta pospone reunion pa trata implementacion di Codigo Civil nobo

Un biaha mas a pospone e tratamento di leynan pa permiti cu como 800 cambio di ley den e Codigo Civil drenta na vigor. Ta cambionan cu ya caba ta aproba pa Parlamento, pero mester tin un instrumento mas e leynan nobo por keda implementa. Tabata dia 8 di September 2016 cu Parlamento di Aruba a vota na fabor di e Codigo Civil nobo. Pero locual a keda pega tabata e asina yama invoeringsverordening pa asina por finalisa e trayecto.

Parlamento di Aruba a keda di trata e ley aki, esta e invoeringsverordening, dia 16 di Februari, pero ayera Presidente di Parlamento Juan ‘Ady’ Thijsen a informa cu a pospone e reunion te proximo aviso. Den otro palabra, no tin ni un fecha poni.

Tin diferente desaroyo andando. Entre otro, lider di partido RED, Ricardo Croes no por atende e reunion como cu e ta den cuarentena. Pero, mirando cu e fraccion di AVP a vota na fabor di e Codigo Civil na 2016, no mester tin motibo pa pensa cu e invoeringsverordening lo no haya sosten di e fraccion di oposicion.

E punto cu kizas tin e tratamento tranca ta e proposicion pa un amienda cu Parlamentario Hendrik Tevreden kier introduci.

Mester bisa cu e Codigo Civil ta necesario, y hasta hueznan ta lamenta cu ainda e no a pasa. Pero tin un amienda inclui den e Codigo, cu a crea hopi discusion na 2016. Ta trata di amienda nr 7. E amienda number 7 cu a keda presenta durante tratamento di e Codigo Civil na 2016, ta trata di union civil. Esaki pues ta habri espacio pa entre otro parehanan di mesun sexo por registra nan union, treciendo cune cu nan ta haya e mesun derechonan legal cu un pareha casa, manera entre otro pensioen.

E amienda aki a trece hopi discusion den comunidad. Originalmente tabata papia di matrimonio di parehanan di mesun sexo pero despues a converti esaki pa union civil. Tabata tin hopi discusion entre partidonan grandi y nan simpatisantenan, cual a hasta causa cu algun parlamentario a retira nan sosten despues di a vota na fabor di e amienda. Por corda tambe con gruponan di sosten di e grupo LGBT a vocifera nan, splicando cu unico cos cu nan kier ta un trato igual. Iglesianan di diferente creencia tambe a duna nan banda di medaya segun nan creencia.

Un di e Parlamentarionan contra e amienda nr 7 aki tabata Hendrik Tevreden kende, segun informacion cu Bon Dia Aruba tin, kier bin cu su propio amienda.

Bon Dia Aruba a tuma contacto cu Desiree Croes, kende tabata miembro di Parlamento cu bringa pa e amienda nr. 7. Su comentario tabata cortico. “A pasa un strepi den e derecho di ciudadanonan. Mi ta hopi decepciona.” Croes a mustra cu cada biaha ta busca un motibo pa pospone e tratamento di e invoeringsverordening.

E introduccion di e Codigo Civil nobo lo facilita e trabao di Censo pa registra personanan di mesun sexo cu ta casa na Hulanda of otro paisnan den Reino. Sharine Luidens a bisa Aruba den pasado, cu su obligacion ta pa sigui ley. Y tanten cu e Codigo Civil nobo no drenta na vigor, e mester traha riba e ley anticua cu ta crea hopi estorbo pa parehanan di e mesun sexo, hasta si nan ta casa.