Shardea Croes, Presidente di Comite Paralimpico hunto cu stagiaire di Canada, Dekkel Bachar a papia di actividad cu lo tin diadomingo awo pa muchanan cu limitacion cu lo competi den varios wega.

Croes ta anuncia cu a pone coach di Aruba den varios tayer internacional cu coach profesional sea na Merca, Cuba, Colombia y Peru, pa asina atleta y coach local por haya e miho conocemento profesional den nan deporte.

Paravolley, parateakwondo, para-atletismo y mas. Pa e prome 50 mucha cu yega lo por ricibi un t-shirt gratis, pa asina nan logra stimula y motiva e muchanan ‘pa logra bin e evento’.

Di parti di e comite kier invita comunidad di Aruba na e evento cu lo tuma luga na centro deportivo Frans Figaroa, pa 4or di atardi te cu 5or di atardi. Na cuminsamento lo tin un demostracion di cada deporte cu ta ofrece na Aruba.

Un evento gratis, cu lo tin dino jump y popcorn pa e muchanan. “Unabes nan keda cla cu e demo- deporte, lo cuminsa cu competencia interescolar. Esaki lo ta e prome biaha cu competencia asina lo tuma luga na scol di mucha cu limitacion. Scol manera Emma School, Paso pa Futuro y Scol Caiquetio ta esunnan cu lo competi contra otro y lo saca e campeon”, Croes a splica.

Pa cada studiante of mucha cu prome cu yega tambe lo tin oportunidad pa saca potret cu nan torch di wega panamericano. Pa nan por sinti orguyo y cu un dia nan lo por wanta un torch pa representa Aruba Internacionalmente den wega paralimpico y panamericano.

“Sin importa con chikito bo ta, locual bo ta pone den bo mente, ta posibel y bo por logr’e si bo ta dedica tempo na dje”, Croes a expresa. Cada participante lo competi y haya nan t-shirt, tambe nan lo ricibi un medaya como premio di aprecio. E proyecto aki ta un final pa stagiaire Dekkel Bachar, kende a bin for di Canada pa presenta esaki.

Bachar, kende a bin dos luna Aruba pa por presente a expresa cu a bay diferente scol na Aruba pa siña muchanan deporte cu desabilidad. “Mi a wak cu cada studiante di scol menciona a haya nan pasion, nan a disfruta y descubri cu nan tin e capacidad di haci loke nan purba, no manera ta wordo bisa cu nan no por haci algun deporte.”

El a continua cu den competencia, e muchanan aki por mustra nan talento y capacidad pa purba y wak kico nan tin den cada scol. E ta un torneo di e scol y ta desea lo miho pa e scolnan gana.

Di scolnan ta spera cu 50 mucha lo por participa den competencia, pero manera nan a informa, e ta pa tur hende sin exclui ‘tur mucha ta invita’. Esunnan cu kier forma parti por yama na 566-8300 na Croes mes of mail Shardeacroes@gmail.com, tambe riba Facebook por manda un mensahe. E competencia lo tuma luga despues di e demo sports, unda tur hende por participa di 4or te cu 5or di atardi.

Felix Piña (Wiwi), Di Dos Secretario di Sport Unie y coach di para-atletismo, a gradici Shardea cu a confia den su persona pa por sigui curso na Miami pa dos siman y na Lima, Peru, unda cu nan a ricibi les di coach profesional riba tereno pafo y paden den les.

Sinembargo, Piña ta expresa cu ta importante pa trece idea pa e futuro coach, pa nan sa cu cualkier persona tin e mesun derecho y mester train tur hende riba casi e mesun nivel.

Presidente Gerald Franca di Sport Unie tambe a colabora den e proyecto, pa motibo cu ta haya un ‘bunita iniciativa’ y por brinda oportunidad na muchanan cu tin cualkier compleho, cu nan tambe por bay y wak kico nan tin aden. “Nos kier hoben, mucha y adulto. Pa nan por mira e proyecto y contribui den esaki”, Franca a finalisa.