Ministerio Publico Federal (MPF) di Brasil a pidi blokeo di te R$ 1 biyon (US$ 320 miyon) di e patrimonio di Carlos Arthur Nuzman, presidente di Comite Olimpico Brasileño (COB); di e empresario Arthur Cesar Soares de Menezes Filho, yama Rei Arthur; y di Eliane Pereira Cavalcante, ex socio di e empresario. E obhetivo, segun procuradornan, ta pa repara e dañonan causa pa e tres personanan, debi na e magnitud mundial di e acusacion di fraude den escogencia di sede di e Olimpiada Rio 2016.

Segun MPF, e personanan investiga a obtene beneficio mediante practica di corupcion y, cu esey, nan a afecta fondonan publico. E peticion di blokeo, cu ta inclui bienes di balor manera apartamento, joya, auto y hasta un yate priva, lo mester ta esencial pa desmantelacion di e organisacion criminal.

Na maart 2016 e corant Frances Le Monde a denuncia cu, tres dia prome cu e escogencia di e ciudad como sede di e weganan, tabatin pago di soborno na dirigentenan di Comite Olimpico Internacional.

Pa 6or di mainta dialuna pasa, agentenan a yega na cas di Nuzman, presidente di Comite Olimpico Brasileño (COB) y di e Comite Rio 2016, pa cumpli cu e orden di buskeda. A haci buskeda tambe na sede di COB. Nuzman lo ser intima pa declara na sede di Polis Federal.

E investigacionnan a haya indicio cu Nuzman tabatin participacion den compra di voto di miembronan di Comite Olimpico Internacional (COI) pa e weganan y cu e lo tabata responsabel pa conecta hende corupto cu e coruptornan.

Ministerio Publico Frances ya tabata haci investigacion riba compra di voto y , via un acuerdo di cooperacion, ta trahando cu Ministerio Publico Federal di Brasil. Diamars mainta autoridadnan Frances tabata presente, acompañando e operacion na cas di Nuzman, na Leblon, zona sur di Rio de Janeiro.

Tin un orden di prizon preventivo contra Arthur César de Menezes Soares Filho, conoci como Rei Arthur (ex doño di e empresa proveedor di estado yama Facility). Eliane Pereira Cavalcante, ex socio di Soares na e empresa, a keda aresta diamars ultimo. E ordennan a ser emiti pa e hues Marcelo Bretas, di e di 7 Vara Criminal di Rio.

Propina di Cabral

Segun Ministerio Publico Federal, Arthur Soares, a transferi US$ 2 miyon di placa di soborno di gobernador di e tempo ey, Sergio Cabral, pa e Senegales Papa Massada Diack, yiu di e empresario Lamine Diack. E obhetivo tabata pa garantisa cu Rio lo tabatin e votonan di miembro di e confederacionnan Africano pa Rio vence den e disputa pa gana e sede di Olimpiada na 2016.

E placa a pasa traves di Mattock Capital Group, un empresa cu sede na Brtish Virgin Islands, y cu Arthur Soares como propietario.

Otro competicionnan, inclusive e olimpiada di Tokio, na 2020, lo a ser afecta pa e set up di corupcion internacional dentro di Comite Olimpico Internacional, di acuerdo cu informacion di declaracionnan haci pa Lamine Diack, tata di Papa Diack, na Ministerio Publico Frances.