Mañan 22 di october ta un fecha special pa Venezolanonan tanto na nan pais como rond di mundo, ta e dia cu lo eligi e candidato cu ta bay representa unidad di oposicion pa competi contra e dictador Nicolas Maduro den eleccion presidencial di 2024.

Pa e motibo aki, e Comite Local di Eleccion Primario na Aruba conforma pa Laura Luces, Tina Farias, Vicente Cristofori y Marllory Medina a tene un conferencia di prensa pa asina informa cu esaki ta bay tuma luga mañan for di 8:00am te cu 4:00pm na Centro di Bario Playa Pabao.

Laura Luces a splica cu e motibo di e conferencia di prensa aki tabata pa nan por yega na e mayor cantidad di Venezolano cu ta vota na isla di Aruba, mañan ta e dia cu oposicion ta bay scoge un candidato unico cu ta bay competi cu Nicolas Maduro den eleccion presidencial di 2024.

Personanan cu por vota, ta esnan cu ta residencia na Aruba cu a logra di vota den eleccionnan presidencial anterior registra na Aruba y esnan cu a registra den e plataforma https://primariaexteriorve.com/ te luna di juli ultimo. Si no ta cumpli cu e dos categoria aki no por eherce nan voto e dia di mañan.

Esnan cu no a logra registra pa participa den Eleccion Primario aki ta bay tin tempo suficiente pa por registra pa eleccion presidencial di proximo aña den e Consulado di Venezuela.

Unico rekisito cu Venezolanonan mester tin pa vota mañan ta e cedula of paspoort, no ta importa si ta caduca, tampoco ta importa nan status migratorio.

Na comienso tabatin 13 candidato y despues a reduci na 10 na unda tin e participacion di Andres Caleca, Andres Velasquez, Carlos Prosperi, Cesar Almeida, Cesar Perez Vivas, Delsa Solorzano, Gloria Pinho, Luis Farias, Maria Corina Machado y Tamara Adrian.

Enrique Capriles Radonski, Freddy Superlano y Roberto Henriquez a renuncia na nan candidatura.

Luces a splica cu e regimen Venezolano a acorda habri e Registro Electoral Permanente Venezolano e cual tabata cera for di algun tempo caba pa asina ey Venezolanonan cu ta biba na otro paisnan por haci nan cambio den registro electoral.

Ademas, el a splica cu mañan na Centro di Bario Playa Pabao ta bay algun miembronan cu ta bay tin informacion di esaki pa eleccion presidencial.

Di su parti, Tina Farias a informa cu personanan cu no tin transporte, problemanan di salud of ta trahando y no por yega na Centro di Bario Playa Pabao tin e opcion cu miembronan di comite por pasa busca nan pa eherce e voto y hiba nan cas of trabou back, pa solicita e servicio gratuito aki por comunica na number di telefon 690.0818 y 566.9343.

Vicente Cristofori a informa cu mientras nan lo tin hende den rij nan ta bay laga e centro habri pa votadonan.